Z hudźbu do póstneho časa
K zazběhej póstneho časa wotměwa so w Budyskej Serbskej cyrkwi prawidłownje prěnju póstnu njedźelu duchowny koncert, tak tež lětsa. A znowa su němscy kaž serbscy wěriwi poskitk dźakliwje přiwzali. Wuhotował je póstny hudźbny nyšpor, ke kotremuž poda tachantski farar a prelat Wito Sćapan wotpowědne meditaciske słowa, Budyski smyčkowy kwartet Chordophone. Do cyłka zjednoćeni su jara agilni čłonojo Serbskeho ludoweho ansambla, kotřiž so tohorunja w Smochčanskim Domje biskopa Bena hustodosć angažuja. Su to Bettina Witke a Matthias Reichel na huslach, bračist Artur Malinowski a cellist Helfried Knopsmeier. Woni wědźachu zaso z derje wupytanymi twórbami wšelakich epochow a stilow připosłucharstwo k rozmyslowanju pohnuć. Přetož „dyrbimy akceptować, zo su naše hodźiny, dny, měsacy a lěta zemskeho žiwjenja wobmjezowane a zo so skónčnje zaso do popjeła wróćimy“, kaž tachantski farar wuwjedźe.
Wjele dobrych idejow zezběrali
Twar modernje wuhotowany
Němsko-serbski šulski kompleks w Slepom skići wurjadne wuměnjenja
Slepo (AK/SN). Gmejna Slepo jako twarski knjez a šulski nošer chce tamniši nowy němsko-serbski šulski kompleks za prošenych hosći 3. apryla oficialnje wotewrěć. To potwjerdźi wjesnjanosta Reinhard Bork (CDU) wčera na posedźenju gmejnskeje rady. Dźeń wotewrjenych duri samsny dźeń, kaž běštej to šuli připowědźiłoj, po wuprajenju wjesnjanosty njebudźe. Tajki termin hodźi so pozdźišo nachwatać. „To běše dołhi čas naše najwjetše komunalne twarnišćo. Nimo wšitkich ćežow je so nam poradźiło, časowy a financny ramik předewzaća spjelnić. Dźakowano financnemu ramikej bě móžno, na wuwiće płaćiznow za twar a dalše sčasom reagować“, rjekny Bork. Wón dźakowaše so nawodźe projekta a planowanskemu běrowej Bauconcept Lichtenstein (njedaloko Zwickauwa), kotryž bě nadawk přewzał.
Štwórć lětstotka za domiznu
Hodźijske towarstwo wobchowuje stawizny a tradicije před zabyćom – a wojuje při tym same přećiwo wulkemu problemej. Wo tym rěčachu tele dny na jubilejnym zarjadowanju.
W Njeswačanskej přirodoškitnej staciji maja tele dny ruki połne ...
Krótkopowěsće (04.03.20)
Budyšan w Choćebuzu wustaja
Choćebuz. „1990 – fotografiske pozicije z jednoho lěta, wo jednym lěće“ – tak rěka nowa wustajeńca w Choćebuskej Dieselowej milinarni. Wona słuša Braniborskemu krajnemu muzejej za moderne wuměłstwo a zmóžnja wosebje načasnym wuměłcam, swoje twórby wustajeć. Tak su tam tež wobrazy Budyskeho fotografikarja Jürgena Maćija widźeć. Wustajeńca je hač do 17. meje přistupna.
Předawanski šlager
Kinspork. Nowy parfim z kamelijowych kćenjow poskića wot minjeneje njedźele Domizniske towarstwo Kinspork. Nowy wudźěłk je mjez kupcami tak požadany, zo bě w běhu jenož dweju hodźin wupředaty. Dalša produkcija wosebiteje wonjaceje wodźički je hižo zaběžała, kaž domizniske towarstwo zdźěla. Přichodny kónc tydźenja budu flakony zaso na předań.
Čěska pomoc Grjekskej
Štó najwótřišo woła a předawa?
Přehladka drasty z dalokeho kraja zajimawa była
Nowoslicy (aha/SN). Přednošk bywšeho stotnika Zwjazkoweje wobory Lothara Girschela přiwabi minjeny pjatk nimale 30 zajimcow do Nowosličanskeho towarstwoweho domu. Nimale dwaj lětdźesatkaj je dźensa w durinskim Sangerhausenje bydlacy w nadawku Zwjazkoweje wobory dobrowólnje we wukraju přebywał. Wot meje 2001 bě wón w běhu třoch lět w Bosniskej a Kosowje. Nazymu 2004 bu jako oficěr za wobstaranje a regulaciju škodow w campje Warehouse zasadźeny. Bě to wojerska baza, něhdźe dźesać kilometrow wot centruma afghaniskeje stolicy Kabul zdalena. Bywši industrijny skład bu přewažnje wot němskich a nižozemskich wojakow zarjadowany. Po wjacorych zasadźenjach w Kabulu bě Lothar Girschel hač do lěta 2018 zamołwity oficěr w pólnym lěhwje Faizabad w horinach sewjerowuchodnje Afghanistana.
Jutře na premjeru
Budyšin. Nowa inscenacija Serbskeho činohrajneho studija w Němsko-Serbskim ludowym dźiwadle „Greta“ změje jutře, srjedu, w 19.30 hodź. w Budyskim Dźiwadle na hrodźe premjeru. Hraja Maria-Helena Bretschneiderec, Katja Hrjehorjec a Clemens Bobka. Wšitcy přećeljo serbskeho dźiwadła su wutrobnje přeprošeni.
Čita z manuskripta
Budyšin. Žónska unija Budyskeho wokrjesa planuje lětsa wjacore zarjadowanja pod hesłom „30 lět znowazjednoćenje“. Prěnje wotměje so jutře, srjedu, w 19 hodź. w Budyskim hotelu „Residence“ na Wjelećanskej. Tam čita bywša zapósłanča zwjazkoweho sejma Marja Michałkowa ze swojeho knižneho manuskripta. Tak dopomina so mjez druhim na wólby poslednjeje Ludoweje komory NDR před 30 lětami, kotrejž je wona tohorunja přisłušała. Po čitanju budźe składnosć k diskusiji.
Nowa wustajeńca
Policija (03.03.20)
Wjelk žiwjenje přisadźił
Běła Woda. Wobchadne njezbožo wjelka dla sta so předwčerawšim po připołdnju na zwjazkowej dróze B 156 mjez Běłej Wodu a Krušwicu. Wjelkaj přeprěčištaj tam jězdnju, jako runje Audi přijědźe. 69lětny wodźer awta njemóžeše hižo zaborzdźić a zrazy do jednoho z njeju. Štyrinohač zražku njepřežiwi.
