Runje hakle widźachmy do komunalnych wólbow wšudźe najwšelakoriše wólbne wabjenje, a za něšto tydźenjow so to wšo wospjetuje. Wšako potom wólby Sakskeho krajneho sejma před durjemi steja. W informaciskich kašćikach gmejny Pančicy-Kukow pak žane wólbne wabjenje hižo njewuhladamy. Po wčerawšim rozsudźe gmejnskich radźićelow w nich žane wuprajenja politiskich stron ničo pytać nimaja. Do tychle kašćikow słušeja informacije gmejny a zarjadniskeho zwjazka kaž tež sportowe a kulturne pokiwy a ničo druhe. Hdyž chcedźa strony a jednotliwcy do přichodnych wólbow na kóždy pad za sebje wabić, da njech tykaja swoje cedlki a ja njewěm što ludźom do listowych kašćikow. Přećiwo tomu drje móžeš so lědma wobarać, tele wašnje wabjenja pak znajmjeńša napohlad našich hasow a pućow­ tak njeskomola, kaž hdyž kóžde pjeć metrow něchtó z milinoweho sćežora na tebje hlada. Marian Wjeńka

Nowe slědźenišćo

Choćebuz. Zběhanku za nowe slědźenišćo Braniborskeje techniskeje uniwersity swjećachu wčera na Choćebuskim centralnym campusu. Za 15 milionow eurow nastawaja tam jara moderne la­bory, eksperimentalne płoniny za materialne slědźenje a wjace městna za ka­tedry. Kompleks z tysac kwadratnych metrow wulkej halu za pospyty chcedźa klětu w štwórtym kwartalu přepodać.

Kino město metro

Praha. Trěbneje wuměny kolijowych prohow dla njebudźe Praska metro na dźělu trasy C wot jutřišeho jedyn tydźeń jězdźić. Jednu z potrjechenych stacijow, Budějovicsku, pak w tym času na uni­katnu kinowu žurlu přeměnja. Wopytowarjo móža sej direktnje na nastupišću dokumentarne kaž tež hrajne filmy z tematiku metro wobhladać.

Zaměr hišće njedocpěty

Wochozy (AK/SN). Łužiski park błudźenkow we Wochozach je wotnětka za ludźi z chorobnym stołom a za tych, kotřiž kmanje chodźić njemóža, lěpje přistupny. Woni móža sej park z nowym elektromobilom wotkryć a wšudźe tam po­zastać, hdźež rjane wuhlady na to přeprošeja.

„Reagujemy tak na wulku ličbu naprašowanjow. Nastajnosći dóstawachmy telefonaty zarjadnišćow za zbrašenych abo tež priwatnych wosobow“, podšmórny předsyda spěchowanskeho towarstwa parka błudźenkow Ulrich Klinkert předwčerawšim na přepodaću jězdźidła. Wone płaći 23 000 eurow. Financowali su je dźakowano spěchowanju z programa „Najlubše blečki za wšěch“ sakskeho ministerstwa za socialne a škit přetrjebarjow. W Pólskej twarjene jězdźidło móža jedna wosoba w chorobnym stole a k tomu třo přewodźerjo wužiwać, abo cyłkownje pjeć wosobow. Elektromobil jědźe ze spěšnosću 15 km/h hač do 40 kilometrow daloko, potom dyrbja jeho baterije zaso nabiwać. Za wodźidłom sedźi sobudźěłaćer parka, kiž po puću jeho zajimawostki rozłožuje.

Zawinowarja njezboža wuslědźili

Brěžki. Dźakowano pokiwam wobydlerjow wuslědźichu nětko zawinowarja wobchadneho njezboža, kotrež bě so tydźenja mjez Brěžkami a Kulowcom stało. Tam bě so wodźer slěbrobarbneho Nissana mopeda šmórnył a ćeknył. 17lětny mopedist a 13lětna sobujěduca so zdźěla ćežko zraništaj. Kaž policija zdźěli, bě 62lětny muž zražku zawinował. Wón změje so nětko ćeknjenja z městna nje­zboža a zapowědźeneje pomocy dla na sudnistwje zamołwić.