Maja lědma hišće srědki
Dyrbja wo zjednoćenju ze susodnymaj gmejnomaj rozmyslować
Trjebin (AK/SN). Prawniski dohladowanski zarjad Zhorjelskeho wokrjesa je lětuši hospodarski plan Trjebinskeje gmejny schwalił. To pak je z krutymi wuměnjenjemi zwjazane, rozłoži komornica Carmen Petrick na wčerawšim posedźenju gmejnskich radźićelow. Hač do 30. nowembra dyrbja woni hospodarski strukturny koncept a naćisk klětušeho etata předpołožić. Tuchwilne hospodarske połoženje gmejny je napjate. Lětsa liča z deficitom poł miliona eurow. Klětu wučinja wón 280 000 eurow. Po słowach Carmen Petrick njezměja „wot klětušeho hižo žane likwidne srědki. Poprawom chcychmy za twar wopłóčkoweje syće kredit brać. Ale to budźe wšo druhe hač jednore.“
Kajki přichod ma kulturny dom?
Wo přichodźe Biskopičanskeho kulturneho domu je město studiju zhotowić dało. Jeje wuslědk je dosć pozitiwny, woznamjenja pak tohorunja wulke wužadanje.
Biskopicy (UM/SN). Namjetowany pjećstołpowy model za Biskopičanski kulturny dom hodźi so zwoprawdźić a je tež hospodarsce zastupujomny. To je wuslědk studije, kotruž su njedawno měšćanskej radźe předstajili. Wuměnjenje pak je spěchowanje projekta we wobjimje znajmjeńša 80 procentow.
Model mjez druhim předwidźi, zo tam wšelke měšćanske zarjady runje tak zaćahnu kaž Sakski krajny zarjad za komunalne datowe předźěłanje (SAKD). Wažnu rólu maja tohorunja posedźenja a kongresy hrać. Kulturne wužiwanje budźe porno tomu jenož hišće nakromny zjaw. Awtorojo studije nimo toho poručeja hotel přitwarić, zo bychu dochody domu zwyšili. Dohromady liča z inwesticiju něhdźe 19 milionow eurow.
Pola Jurkec w Nowoslicach je wosom howjadow tele dny zymski kwartěr ...
Krótkopowěsće (06.06.19)
Měrliwu rewoluciju hódnoćił
Berlin. Zwjazkowy sejm je dźensa měrliwu rewoluciju w NDR před 30 lětami a tehdyšu zmužitosć hibanja za wobydlerske prawa hódnoćił. „Murja njeje so prosće zwjezła, ale ludźo su aktiwnje jednali, zo so sypnje“, rjekny społnomócnjeny za wuchod zwjazkoweho knježerstwa Christian Hirte (CDU) dźensa w plenumje. Wobydlerjo w NDR su sej swobodu a demokratiju sami wuwojowali.
Serbske potajnosće na statoku
Chrósćicy. Šćěpan Hanuš budźe fasadu Kralec statoka w Chrósćicach wuhotować. Tema maja serbske potajnosće być. Móžny je projekt dźakowano sakskemu statnemu ministerstwu za wobswět a ratarstwo, kotrež zběraše ideje za wjesne kónčiny, při čimž běchu kreatiwne namjety zhromadneho žiwjenja prašane. Přichodnu wutoru ma wuměłc oficialny nadawk za wuhotowanje fasady dóstać.
Wuběrk přiražku přizwolił
Policija (05.06.19)
Muža dwójce zajeli
Budyšin. Hnydom dwójce móžeše sej młody muž póndźelu celu Budyskeho policajskeho rewěra wotnutřka wobhladać. Dopołdnja bě wón na Póstowym naměsće zakazane parole bjakał a prawicu wupřestrěł. Alarmowanym policistam wón na to wudma nadawaše. Dokelž nochcyše muž tež po chutnej rozmołwje ze zastojnikami bjakać přestać, jeho sobu wzachu. Na rewěrje naměrichu pola njeho 2,28 promilow alkohola w kreji. Lědma zo běchu jeho popołdnju pušćili, 33lětny na Hošic hasy znowa parole wołaše. Na te wašnje zawěsći sej wón wospjet wopyt w celi policajskeho rewěra. Wčera rano su jeho druhi raz na swobodu pušćili. Decernat statny škit Zhorjelskeje policajskeje direkcije so z padom nětko zaběra.
Na idejowu dźěłarničku
Budyšin. Załožba za serbski lud přeprošuje na zjawnu idejowu dźěłarničku k projektej „Lawski areal“ a rumnostnym kapacitam w Serbskim domje, kotraž budźe pjatk, 7. junija, wot 18 do 20.30 hodź. na žurli Budyskeho Serbskeho domu. Direktor Załožby za serbski lud Jan Budar předstaji dotalny staw koncepcije za twarski projekt na Lawskich hrjebjach. Nimo noweho domicila za Serbski institut, Serbski kulturny archiw a centralnu biblioteku rozmysluja wo dalšim přerjadowanju serbskich zarjadnišćow. Wotewrjene je nimo toho prašenje wužiwanja 4. poschoda Serbskeho domu po wućahu rozhłosoweho sćelaka MDR. Z wopytowarjemi chcedźa prašenja rozjimać a koncepciju konkretizować.
Sympozij wo klóšterskim kraju
W Kulowcu hotuja so na měšnisku swjećiznu a primicu
Kulowc (SN/JaW). Přihoty na měšnisku swjećiznu a primicu Pětra Mróza, kotrejž budźetej sobotu do swjatkow a swjatki njedźelu, tež w ródnej wsy nowoměšnika w Kulowcu z połnej paru běža. Wčera je tam něhdźe 20 młodostnych z Kulowca, Koćiny, Róžanta a Němcow kaž tež swójbnym pomhało čestne wrota wić.
Trochu wobćežne bě, najrjeńše šmrěkowe hałžki za wulkej žerdźi a wjeršk wrotow wuběrać, dokelž so lońša suchota wězo na štomach pokazuje, kotrež su najebać dešć w lětušich prěnich měsacach tola chětro suche. Přiwšěm su pilni pomocnicy swój za wčera stajeny zaměr docpěli a čestne wrota dozhotowili. Tuchwilneje horcoty dla składuja pletwu w chłódnej bróžni Mrózec swójby a ju wšědnje krjepja, zo njeby wuschnyła. Pjatk nawječor chcedźa młodostni čestne wrota před ródny Mrózec dom w Kulowcu postajić.
Mlokowy připowěšak so zwróćił
Dźěl stawiznow zachować
Starusec bróžnju w Rownom jako městnosć wuměłstwa znowa natwarja
Slepo (AK/SN). Dźěl Rownoho, kotruž mjenuja Wowčernju, so brunicoweje jamy dla přichodne lěta zhubi. Tamnišu kładźitu Starusec bróžnju pak chcedźa zachować, přesadźić a znowa natwarić. Za to je Slepjanska gmejnska rada wčera puć runała a twarski plan nastajiła.
Tuchwilu słuša Starusec bróžnja LEAG. Priwatny zajimc chce ju energijowemu koncernej wotkupić a bróžnju w Rownom blisko Strugi znowa natwarić. Wjacori wobydlerjo kaž Rudi Krawc, Edith Pjenkowa a Christian Pjenk běchu so w zašłosći za nju zasadźeli. Bróžnju z přitwarom chce priwatny zajimc přichodnje jako Rownjanski wuměłski statok z ateljejom, wustajenišćom kaž tež z bydlenjom a běrowom wužiwać. „Za přichod je předwidźane, w bróžni trajnu wustajeńcu regionalneho wuměłstwa zaměstnić“, rěka w předłoze za nastajenje twarskeho plana. Dale móža tam rozdźělne wustajeńcy wuměłcow zarjadować, při čimž ma pod pomnikoškitom stejaca bróžnja centralne městno zabrać.
Swójsku štučku hromakej zanjesli
Židźino (UH/SN). Wjeleličbny publikum je poprawom hižo zwoprědka zaručeny, hdyž Židźinske drastowe towarstwo prěnju njedźelu junija na swačinu na pólnej mjezy přeprošuje. Lětsa wšak telko wopytowarjow kaž hewak njebě, štož pak njezaležeše na programje, ale skerje na mnohich poskitkach samsny dźeń w bliskosći.
Po dujerskich muzikantach z Wjelceje witaše předsyda drastoweho towarstwa Uwe Schuster Židźinski chór pod nawodom Kerstin Lieder. Tón njezawjeseli publikum jeno z němsko-serbskim repertoirom, ale tež z humorom, jako spjelni plahowarjam hromaka na Horach jich přeće za „hromakowym spěwom“. Cyły spěw wšak to poprawom njebě, ale znajmjeńša štučka, kotruž je Kerstin Lieder z hromakom w ruce dirigowała. To so tež jednaćelej Horjanskeho agrarneho předewzaća Rolandej Nukej zalubi. Skónčnje přeprosy Židźinski chór hišće na zasowidźenje, a to 3. julija na wječorne spěwanje pod domjacym Měrowym dubom. Tam witaja lětsa jako hóstne ćěleso chór Lipa z Pančic-Kukowa.
