Runowaha ma knježić
1W swojim lětaku sym cyle jasnje podał, kotre wužadanja na nas w Radworskej gmejnje přichodnje čakaja. Kotrym měli so prěnjorjadnje wěnować, nochcu na tymle městnje sam posudźować. Wo rjedźe a zwoprawdźenju naprawow wšak doskónčnje gmejnska rada rozsudźi. W přichodźe widźu so jako kapitan teama a nic jako tón, kiž wšitko sam wobzamknje.
2Njewěm, hač ma so w gmejnje zasadnje něšto změnić. To dźě by woznamjenjało, zo zakładnje něšto wopak běži. Tak negatiwnje połoženje w Radworskej gmejnje njeposudźuju. Mi je wažne, zo kóždy wjesny dźěl w samsnej měrje hódnoću a zo runowaha knježi. Štó drje čuje so rady zabyty?
3Serbstwo je kruty wobstatk gmejny. Nimo zachowanja lětstotki starych tradicijow a nałožkow je wažne, zo serbšćinu wšědnje nałožujemy. Dwurěčne napisy su mi runje tak wažne kaž dobra komunikacija z nawodnistwom našeje šule a z pěstowarnjemi w gmejnje. Wosebje mi na wutrobje leži, model Witaj zachować a po móžnosći dale wuwiwać. K tomu sym w zašłosći hižo we wulkej měrje přinošował.
Haćidła přewinyć
1Hladajo na wšitke 24 wjesnych dźělow Radworskeje gmejny je wažne infrastrukturu zachować a wutwarić. Nimo dróhotwara tež šule a wodźizny k tomu słušeja. Nimo toho mi podpěra tudyšich zawodow a towarstwow na wutrobje leži. Jako wjesnjanostka chcu tež wobydlerjam bliska być, štož woznamjenja docpějomnosć a wotewrjene wucho za kóždeho. Jeno zhromadnje móžemy gmejnu zachować – abo hišće lěpje: wuhotować a wuwiwać!
2Štož derje běži a je derje wotběžało, měło so dale wjesć. Přiwšěm chcu rěčne hodźiny za wobydlerjow zarjadować. Tak je docpějomnosć zaručena, a kóždy wobydler móže swój wopyt na zarjedźe planować. Nimo toho chcu prawidłowne rozmołwy z předewzaćelemi přewjesć. Zakładnje měli so wšitke předewzaća, na přikład nastupajo syć dróhow a wodźiznow, ale tež wobswětlenje pućow po prioritach a spěchowanskich móžnosćach za gmejnsku radu zdźěłać a wotpowědnje wobzamknyć.
Hišće wjele potenciala
1Jedne z najwažnišich ćežišćow je, zo stanje so naša gmejna atraktiwna młodym swójbam a zo poskićamy starym ludźom perspektiwy, derje wobhladani tu wostać. Chcu, zo su nowe twarske ležownosće za bydlenske domy z dobrym wobchadnym zwiskom ke kubłanišćam wupokazane. Chcu so wo inwestorow prócować, kotrež w našej gmejnje zapłaćomne starobje wotpowědne bydlenja resp. bydlenja z wobstajnym hladanjom poskićeja. Za předewzaćelow, zawody a wšěch tych, kotřiž maja wotpohlad so zesamostatnić, chcu z dobrym partnerom při zwoprawdźenju jich projektow być. A dokelž je w Němskej wjele spěchowanskich srědkow, chcu je přemyslene wotwołać dać. Trjebamy w gmejnje ofensiwu za inwesticije.
2Hłowny nadawk gmejny je, ludźom, kotřiž tu bydla a dźěłaja, žiwjenje wolóžić. Tohodla chcu gmejnski zarjad na moderne na serwisowe zarjadnistwo přeměnić, kotrež wobydlerjow z informacijemi ze zarjada, towarstwow a wjesnych dźělow zastaruje, jich naležnosće chutnje bjerje a je profesionelnje wobdźěłuje. Komunikacija je kluč k přewinjenju zadźěwkow.
Atraktiwnosć wsow powjetšić
1Nimo zawěsćenja šulskeho stejnišća, podpěry młodźiny, wutworjenja noweho bydlenskeho sydlišća je za mnje tež wažne, atraktiwnosć wsow powjetšić. Sym přećiwo nošerstwu našeju šulow přez wokrjes. Tež fuzija z Wulkej Dubrawu za mnje do prašenja njepřińdźe, dokelž potom cuzy rozsudźa što so stawa abo nic. Wojować chcu wo přiměrjenu financnu podpěru našich kubłanišćow přez Saksku. Wumjetowanja w zašłosći běchu, zo šulu na kóšty druhich inwesticijow financuja, štož njetrjechi.
2Ludźo a zamołwići měli lěpje mjez sobu wobchadźeć, wosebje tam, hdźež su tučasnje konflikty, kaž smjerd. Kwalita realizacije inwesticijow měła so na kóždy pad polěpšić, zdobom tež žiwjenska kwalita w gmejnje. Tež wobswětlenje, chódniki a lěpša komunikacija mjez gmejnu a wobydlerjemi su zwoprawdźomne. Transparenca dźěła wjesnjanosty ma zasadny zaměr być. Tež zaměrniše spěchowanje našich kulturnych zetkanišćow w gmejnje je wažny wobstatk přichodneho dźěła.
Woni chcedźa na čoło gmejny Radwor
Serbske Nowiny předstajeja kandidatce a kandidatow za wólby wjesnjanosty:
Štyrjo kandidaća nastupja k wólbam wo zastojnstwo wjesnjanosty gmejny Radwor. Serbske Nowiny su wšitkim požadarjam štyri prašenja stajili, na kotrež woni tule wotmołwjeja.
1 Što su waše najwažniše ćežišća?
2 Što chceće w gmejnje zasadnje změnić?
3Kotru hódnotu ma serbskosć w gmejnje, a kak chceće rěč a kulturu spěchować?
4 Kajku předstajeće sej Radworsku šulu w přichodźe?
Pytaja plahowarjow za wohroženu družinu kokošow
Stróža (SN/MWj). Dźeń a wjace ludźi na swójskej ležownosći kokoše plahuje a so tak wobstajnje nad čerstwymi jejkami wjeseli. Štóž za swój pjeriznowy hobby snano runje nowu družinu pyta, tomu móže biosferowy rezerwat Hornjołužiska hola a haty saksku kokoš poručić.
Saksku kokoš běchu wokoło lěta 1880 w Rudnych horinach plahowali. Spokojnosć, robustnosć a přiměrjenosć ju wuznamjenjeja. Tohodla so tale družina za plahowanje we wjesnej kónčinje wosebje derje hodźi, rěka w nowinskej zdźělence zarjadnistwa biosferoweho rezerwata. Přiwšěm je wobstatk chětro woteběrał, tak zo eksistuje wokomiknje jenož hišće něšto stow zwěrjatow mjenowaneje regionalneje družiny. Towaršnosć za zachowanje starych a wohroženych družin domjaceho skotu zastopnjuje saksku kokoš tohodla jako ekstremnje wohroženu.
Móžnosće za turizm rozjimali
Dźěłarnička wobydlerjow wo wobmyslenjach, idejach a nadźijach
Hórnikecy (AK/SN). Znowawotewrjenje Hórnikečanskeje Energijoweje fabriki w juliju zmóžnja dołhodobne šansy za turizm. Muzej a wjes měłoj přichodnje wusko hromadźe dźěłać, dokelž móhł jedyn wot druheho profitować. To bě tele dny poselstwo wobydlerskeje dźěłarnički, na kotruž běštej wjesna rada a Energijowa fabrika přeprosyłoj. 13 zajimcow bě do wobydlerskeho centruma přišło. „Naš zaměr je 50 000 wopytowarjow wob lěto. Při tym njeńdźe jenož wo busowe skupiny, ale tež wo młode swójby z dźěćimi a wo sportowsce aktiwnych“, rozłoži Maria Schöne. Wona je wot lońšeho muzejowa pedagogowka Energijoweje fabriki a wuwiwa mjez druhim dołhodobne koncepty a temowe namjety za turizm.
Policija (30.01.20)
Cigarety a palenc kradnyli
Huska. Z pomocu gulijoweho wěka, kotrež běštaj z puća wuzběhnyłoj, rozbištaj dotal njeznataj skućićelej we wčerawšich rańšich hodźinach w Husce wukładne wokno wobchoda. Z njeho pokradnyštaj cigarety a alkoholiske napoje w dotal njeznatym mnóstwje.
Wjesnu zhromadnosć skrućili
Za SKC chcedźa přichodne lěta tójšto pjenjez nałožić
Poprawom chcyše Slepjanska gmejnska rada hižo spočatk januara swój hospodarski plan 2020 wobzamknyć. Tehdy pak bě hišće wjele wotewrjenych prašenjow. Nětko su je na wurjadnym posedźenju parlamenta rozrisali, při čimž je tež prawniski dohladowanski zarjad Zhorjelskeho wokrjesa ćišć wukonjał.
Slepo (CK/SN). Hač do lěta 2023 chce gmejna Slepo energijowy koncept zdźěłać, wukony komunalneho twarskeho zawoda z gmejnskeho wobłuka wuspinkować a wudawki za turizm a kulturu „zasadnje přepruwować“. To su jeno tři z cyłeje lisćiny naprawow, z kotrymiž chce komuna přichodne lěta swoje financy lěpje rjadować.
