Policija (08.01.20)
Nuzowy milinowy agregat spakosćili
Dalicy. Po wšěm zdaću njemějachu paduši w Dalicach (Dahlowitz) hižo žanu milinu. Kónc abo spočatk lěta běchu so tajcy na ležownosć zawoda zadobyli a nuzowy milinowy agregat spakosćili. Dokelž trjebaš za ćěrjenje tajkeho nastroja tež ćěriwo, su dwanaće kanistrow diesela – kaž policija zdźěla, wučinja to něhdźe 430 litrow – hnydom sobu wzali. Zwěsćili su njeskutk hakle předwčerawšim. Rubizna měješe hódnotu něhdźe 1 300 eurow. Wěcna škoda wučinja 2 000 eurow.
Nawodniska stafeta třećej generaciji dowěrjena
Minjenu njedźelu njeběchu jenož katolscy Serbja Budyskeje tachantskeje wosady znowa na hodowničku přeprošeni, ale bě to wospjet tež zhromadne popołdnjo z ewangelskimi Serbami. Zetkanje ze wšelakimi hosćimi, kotrež běše swój čas prelat Jan Andricki zawjedł, wotmě so lětsa 55. raz.
Přibližnje 150 ludźi wšěch generacijow móžeše prelat Wito Sćapan na žurli swjateho Bena na Tzschirnerowej witać. Wón dźakowaše so Ludmile Bizoldowej za wjelelětne organizowanje swjedźenja z hodownej swačinu a stajnje wotměnjawym kulturnym programom. Wona běše słužbu wot swojeje maćerje Hańže Rjenčoweje přewzała. Nětko je Ksenja Měrćinkowa stafetu w třećej generaciji přewzała. Zhromadnje z Madleńku Šołćic je so wona wo kulturny program starała, kotryž wopokaza so jako wšeje chwalby hódny, wuprudźacy čerstwosć ducha a zdobom zdźěłanosć našich młodych swójbow.
Dokal z hodownym štomikom?
Slepo ma so wažne křižnišćo stać
Slepo (AK/SN). Po Hórce pola Niskeje ma so nětko tež Slepo z wažnym křižnišćom stać, kotrež bus a železnicu zwjazuje. K tomu je so wčera Slepjanska gmejnska rada wuznała. Na swojim prěnim wuradźowanju lěta 2020 je gremij z wjetšinu wobzamknył, podać planowanja za tak mjenowane „zwiskowe stejnišćo bus-železnica“. Nadawk přewozmje Zhorjelski inženjerski běrow Richter & Kaup. Z wobzamknjenjom sćěhuje gmejnska rada poručenje Zhorjelskeho wokrjesa a zaměroweho wobchadneho zwjazka Hornja Łužica-Delnja Šleska (ZVON).
Jolka je swjedźeń tradicijow
W Nukničanskej Brězanec bróžni wočakuja zaso wulki hołk a tołk
Nuknica (SN/mwe). „Sioux tepi bozanku“ rěka program 22. jolka-swjedźenja sobotu w Nuknicy. Pod nawodom Michała Cyža su do njeho muski a dźěćacy chór, žónska skupina, SG Sněhowka a nic naposledk kapała SerBeat zapřijate. Wězo změje braška Marko Jurk z Prawoćic, kaž wot wšeho spočatka, zaso moderaciju na starosći. A dźakowni organizatorojo su, zo jim ratar Józef Brězan znowa swoju bróžnju přewostaji.
Něhdźe dźesać tydźenjow je so wosebity gremij wokoło Jakuba Brězana, Feliksa Woka, Katrin Matkec a dalšich ze spěwami, skečemi a rejemi zaběrał. Njeje dźě lochko kóžde lěto program na porjadnym niwowje zestajeć, sej směški a pryzle wo regionalnych a nadregionalnych podawkach wumyslić. To rěka, zo chcedźa tež zaso wěstych ludźi na cyle wosebite a zwučene „Nukničanske wašnje pošwikać“.
Krótkopowěsće (08.01.20)
Dźeń a wjac hladanja potrěbnych
Kamjenc. Sakska ma so na dale a wjac hladanja potrěbnych nastajić. Hač do lěta 2030 jich ličba wo pjećinu na 242 000 rozrosće. Tele daty wuchadźeja z wobličenjow krajneho statistiskeho zarjada ze sydłom w Kamjencu, kotrež su wčera wozjewili. Před lětomaj bě w swobodnym staće něhdźe 205 000 ludźi na hladanje pokazanych.
Christine Ruby prěničku wudała
Drježdány. Pod titulom „Späne – Gedichte“ je Christine Ruby swoju prěnju zběrku basnjow předpołožiła. Wušła je kniha w Typostudio Schumacher Gebler Drježdźany. Publicistka z Radebeula, kotraž je tež za Serbski sejm kandidowała, předstaji swoju prěničku 29. januara w Radebeulskej kniharni Sauermann.
Tesla ma 41 milionow płaćić
Znowa traktory wótře tukotali
Šesty króć wotmě so njedźelu na Horje pola Bóšic zymske zetkanje wlečakow. Organizowało bě zarjadowanje Horjanske towarstwo přećelow wlečakow, kotremuž přisłuša 45 čłonow.
Hora (SN/mwe). Mócne tukotanje a přewšo dobra nalada knježeštej zawčerawšim wot 10 hodź. hač do pózdnjeho popołdnja při Horjanskim wjesnym haće, jako zetka so tam něhdźe 200 lubowarjow a wobsedźerjow traktorow a oldtimerow. Mjez nimi běchu přećeljo wlečakow z Koblic, Ralbic a Trupina. Tež z Halštrowa bě muž ze swojej Lanz-buldoku přijěł.
Policija (07.01.20)
Wjac hač 8 500 eurow škody
Delni Wujězd. Hładkosće dla je njedźelu rano žona na zwjazkowej dróze B 156 mjez Delnim Wujězdom a Lěskej w Malešanskej gmejnje ze swojim BMWjom znjezbožiła. Kaž policija wčera zdźěli, bě 49lětna po puću do směra na Budyšin, je pak kontrolu nad wodźidłom zhubiła a so z awtom z jězdnje sunyła. Zbožo w njezbožu bě, zo so šoferce ničo njesta. Bolostne pak za nju přiwšěm je, zo dyrbjachu awto wotwlec, dokelž njemóžeše z nim wjace jěć. Tak drje budźe dyrbjeć hłuboko do móšnje sahnyć, chce-li je sporjedźeć dać. Škodu trochowachu zastojnicy mjenujcy na wjac hač 8 500 eurow.
Wopłóčki maja prioritu
Łazowski wjesnjanosta zhladuje na minjene lěto
Łaz (AK/SN). Na wupjelnjene a chětro spěšne lěto 2019, kotrež bě zdobom bohate na podawki, móže Łazowska gmejna zhladować. To podšmórny wjesnjanosta Thomas Leberecht (CDU). „Gmejna ma skónčnje plan wo wužiwanju ležownosćow, planowanje twarskeho nawodnistwa za towarstwowy centrum při Hórnikečanskim jězoru je zakónčene, a jednanja za wuwiwanje našich jězorow smy dale wjedli“, wón bilancuje. Tohorunja zakónčić móžachu přizamknjenje k centralnej wopłóčkowej syći w Běłym Chołmcu (Weißkollm) a Koblicach (Koblenz). Za to je komuna něhdźe 1,7 milionow eurow nałožiła. Runočasnje je wjacore komunalne puće saněrować dała. W Běłym Chołmcu nasta z pomocu staršich nowe hrajkanišćo. „Dale zesylnjamy zhromadne dźěło z čěskim městom Doksy“, rjekny Leberecht. „Mój lońši wosobinski highlight bě, zo sym před hospodarskim wuběrkom Němskeho zwjazkoweho sejma nastupajo dočasny kónc wudobywanja brunicy kaž tež hladajo na trěbny zakoń wo sylnjenju struktury za wuhlowe regiony rěčał.“
