Wudźeržuje dobry zwisk k ludźom
Pančicy-Kukow (SN/MWj). Mjeztym dlěje hač pjeć lět maja gmejny zarjadniskeho zwjazka Při Klóšterskej wodźe wobydlerskeho policista. Policajski hłowny mišter Uwe Mittag ma kóždu wutoru w běrowje na delnim poschodźe zarjadniskeho zwjazka w Pančicach-Kukowje rěčne hodźiny. Wonkowne znamjo toho je, zo steji potom zwjetša jeho słužbne policajske awto na parkowanišću. Jeli tomu raz tak njeje, so ludźo hižo dźiwaja.
Na mnohich městnach tuchwilne suche wjedro wužiwaja, zo bychu syno ...
Krótkopowěsće (07.06.18)
„Lampenfieber“ zakónčeny
Budyšin. Wot Budyskeho Kamjentneho domu a wokrjesneje lutowarnje zarjadowane wubědźowanje talentow „Lampenfieber“ je so njedawno w Němsko-Serbskim ludowym dźiwadle zakónčiło. Mjez druhim staj šulerjej Serbskeho gymnazija Budyšin Lilly Roitsch a Clemens Bobka ze sceniskim čitanjom w segmenće „HUBA & SŁOWO“ myto dobyłoj.
Předewzaćelske myto spožčene
Zhorjelc. Lětuše 5. Zhorjelske předewzaćelske myto spožči tamniši zwjazk předewzaćelow wčera Němskej Software Engineering & Research tzwr. Zawod bu lěta 2006 w Zhorjelcu jako „idejowa fabrika“ załoženy a ma mjeztym 30 mjezynarodnje skutkowacych sobudźěłaćerjow. Zawod je so na digitalizaciju specializował a dale rosće, rěka we wopodstatnjenju.
Awtodróhi spěšnišo twarić
Přesadźuja swinje a pjeriznu
Budyšin. Zjawne přesadźowanje swini a pjerizny budźe jutře, štwórtk w 10 hodź. w Budyskim krajnoradnym zarjedźe na Dwórnišćowej w stwě 007. Jedna so wo 60 swini, mjez nimi dwě rancy z prosatami a šěsć kundrozow. Dale poskićeja 16 huškow, 33 husow, 21 kačkow a dalšu pjeriznu. Wšón skót přesadźuja jako jedyn los. Bywši wobsedźer njemóže skót hižo zastarać.
Radźićeljo so zetkaja
Pančicy-Kukow. Přichodne zjawne posedźenje gmejnskeje rady Pančicy-Kukow budźe jutře, štwórtk, w 19 hodź. w awli Šule Ćišinskeho. Na dnjowym porjedźe steja wjacore twarske temy. Mjez druhim póńdźe wo wužiwanje zbytkow Lejnjanskeje mlokarnje a wo třěšne wokna šulskeho twarjenja. Přizamknje so njezjawny dźěl posedźenja.
Koncertuja w ruinje cyrkwje
Budyšin. W rozwalinje Budyskeje mnišeje cyrkwje wotměje so zajutřišim, 8. junija, w 19 hodź. chórowy koncert. Budyski chór pisaneho swěta pod nawodom Reinharda Simmgena a Beaty Tarrach jón wuhotuje. Zastup je darmotny. Za to proša wo dary za projekt w Nepalu.
Policija (06.06.18)
Wopita na staršiski wječor
Budyšin. 45lětna je so zawčerawšim wječor po puću k Fichtowej šuli ze swojim BMWjom VWja šmórnyła, swoje awto na to wotstajiła a na staršiski wječor do šule šła. Jako so wróći, policija na nju hižo čakaše. Při kontroli naměrichu pola njeje wjace hač 2,5 promilow alkohola w kreji. Domoj jěć wona w tym stawje wězo njesmědźeše.
Bursa mineralijow ze žadnostkami
Wochozy (FAG/SN). „Dźeń kamjenjow“ rěkaše bursa mineralijow, kotruž přewjedźechu minjeny kónc tydźenja we Wochožanskim parku błudźenkow. Na třećej tajkej přehladce wobdźěli so wjace hač 30 wikowarjow. Nimale wšitkich znaje Wilfrid Sauer, kiž je wjele lět wuchodosaksku skupinu towarstwa Přećelow mineralogije a geologije nawjedował. Loni je jeho syn Frank nawodnistwo 75 čłonow wopřijaceho cyłka přewzał.
Mjez zahorjenymi fanami mineralijow běštaj we Wochozach Karl Busch a jeho mandźelska Helene z Lahntala-Großfeldena. Nimale 50 lět wobaj mineralije zběrataj. „Doma mamoj štyri stwy połne. Hižo jako dźěło běch jara z přirodu zwjazany, běch předsyda přirodoškitneho zwjazka NABU a dźěłach wusko z našim muzejom hromadźe“, powědaše 76lětny. Jeho zběrka wopřijima kamjenje z cyłeho swěta. „Bjez dźiwa, zo móže tajki hobby móšeń chětro poćežować“, praji Karl Busch.
Ćežka technika na lětanišću
Mysla hižo na adwent
Drježdźanska agentura móhła Budyske Wjacławske wiki wožiwić
Budyšin (CK/SN). Wjacławske wiki skića harmoniski wobraz a k tomu dobre wonkowne wuměnjenja, wšelake temowe wobłuki zapřijeć. To měni Holger Zastrow, kiž w Drježdźanach eventnu agenturu wjedźe a wobstajnje wulke swjedźenje organizuje. Wón chwali tohorunja wobšěrnu strukturu wikowarjow na Budyskich adwentnych wikach. Druhdźe dyrbja zarjadowarjo płaćić, chcedźa-li wikowarjow z tak wulkim wuběrom tworow zdobyć. W rozmołwje z Budyskim wyšim měšćanostu Alexanderom Ahrensom (SPD) pak pokaza Zastrow tež na to, zo hodźało so na Žitnych wikach něštožkuli polěpšić.
Dalše nadawki za šulu wupisane
Slepo (AK/SN). Twar němsko-serbskeho šulskeho centruma w Slepom dale postupuje. Nawoda twarskeho wotrjada Slepjanskeho zarjadniskeho zjednoćenstwa Steffen Seidlich je na wčerawšim posedźenju Slepjanskeje gmejnskeje rady tuchwilny staw na twarnišću rozłožił.
Tak su w zakładnej šuli prěnju płonu třěchu dozhotowili a prěnje wokna zatwarili. We wyšej šuli je wjerch nad biblioteku hotowy. Dźensa su tam dalši betonowali. W sportowni je wjerch nad sanitarnymi rumnosćemi wukidany. 28. meje zetkachu so zastupjerjo gmejny ze zastupjerjemi horta a zakładneje šule, zo bychu wšelake prašenja nutřkowneho wuhotowanja rozjimali. Samsny dźeń rěčachu wo tym tež ze zastupjerjemi wyšeje šule.
Do nakładnistwa a kniharnje
Budyšin (SN). Składnostnje 60. róčnicy załoženja Ludoweho nakładnistwa Domowina su wšitcy čitarjo, awtorojo, wudawaćeljo, přełožerjo a přećeljo nakładnistwa na dźeń wotewrjenych duri a Dołhu nóc kultury sobotu, 9. junija, wot 14 do 17 hodź. do nakładnistwowych rumnosćow a do Smolerjec kniharnje na Sukelnskej 27 w Budyšinje přeprošeni. Sobudźěłaćerjo wustajeja na jednotliwych poschodach knihi, nowiny, dokumenty, fota a zajimawostki ze stawiznow nakładnistwa. Zajimcy dóstanu dohlad, kak dźensniši dźeń nowina a knihi nastawaja a w kotrych powołanjach móžeš w nakładnistwje dźěłać. Dźěći móža so w molowanju pospytać, so na rallyeji wědy po domje wobdźělić a słuchoknihi poskać. Poskićenej budźetej tohorunja kofej a tykanc. W Smolerjec kniharni wustupitej mała skupina Hercy 1. serbskeje kulturneje brigady z hudźbnym programom a klankodźiwadźelnik Měrćin Krawc.
