Budyski wokrjesny sejmik je na póndźelnym posedźenju wokrjesnemu zarjadnistwu nadawk dał, stejnišćowy posudk za móžny narunanski nowotwar płuwanskeje hale w Kamjencu zdźěłać.

Budyšin (SN/at). Móžny narunanski nowotwar płuwarnje w Kamjencu w Budyskim wokrjesnym sejmiku rozjimać bě trjeba, zo móhło so zarjadnistwo hišće wo najwyše móžne spěchowanje – hač do 85 procentow – ze srědkow Europskeje unije starać. A runje tale warianta je porno wo­spjetnemu saněrowanju lěta 1995 posledni raz wuporjedźeneje hale požadliwosće (Begehrlichkeiten) w zapadnym wokrjesnym teritoriju zbudźiła. Tajke jewjachu so tež w debaće. Wšako twjerdźeše předsyda frakcije SPD/Zelenych Gerhard Lemm, zo terminus „narunanski twar legalnje definowany njeje“. Zarjadnistwo a mnozy diskusijni rěčnicy wuprajichu so za to, runać puć za tajki nowotwar w Kamjencu. Saněrowanje spěchuje EU jenož połstaprocentowsce.

Nowa płuwarnja by zdobom na dobro šulerjow zakładnych šulow w Ralbicach, Worklecach, Chrósćicach, Pančicach-Kukowje, Kulowje abo Njeswačidle była, kotřiž maja tam wučbu płuwanja.

Alexander Šmit kandiduje lětsa prěni raz za Worklečansku gmejnsku radu, zastupujo Serbske wolerske zjednoćenstwo. Za 34lětneho je samozrozumliwe so čestnohamtsce angažować, štož njebě jemu dotal mało chwile dla móžno. Hakle njedawno je wón studij na Rózborskej Policajskej wysokej šuli wuspěšnje zakónčił. „Wosebje towarstwa mi na wutrobje leža“, wón powěda, „hač sportowe abo kulturne. Wšitke skrućeja wjesnu zhromadnosć a maja tuž wotpowědnje a po móžnosći w jenakej měrje podpěrane być.“ We Worklečanskej gmejnje je so w zašłosći tójšto hibało a změniło, we wobrazu wjesnych dźělow runje tak kaž we wobydlerstwje. Dokelž je so tójšto młodych swójbow zasydliło, nasta dobra měšeńca w ludnosći. Mjez sobu so jara derje wudospołnjeja. Mjeztym hromadźe nyšpory swjeća abo organizuja zhromadne wulěty. A wjesnjenjo dźě maja swoje předstawy, kak móhli w přezjednosći dobru zhromadnosć hajić. Tež to měł gmejnski parlament wobkedźbować.

Sakska policajska wysoka šula změje w Budyšinje dalši wažny centrum. Na prěni zaryw noweho stejnišća su sej wčera tež krajneho policajskeho prezidenta Horsta Kretzschmara přeprosyli.

Budyšin (UM/SN). Jako prěnje chcedźa w Budyšinje tam zaměstnjenu dotalnu policajsku šulu modernizować. Tak maja wčerawšemu prěnjemu zarywej dalše slědować. „Jedna so wo jara wobšěrne předewzaće z wjacorymi twarskimi wot­rězkami“, zwurazni na prěnim zarywje přitomny sakski financny minister Matthias­ Haß (CDU). Za to dyrbi wón cyłkownje 80 milionow eurow z krajneho etata přewo­stajić. To pak, kaž Haß rjekny, rady čini. „Inwesticija we wobłuku wu­kubłanskeje kwality sakskeje policije su derje zapołožene pjenjezy.“

Z 15 lětami z mopedom jězdźić

Berlin. Zwjazkowy kabinet je dźensa puć runał, zo smědźa młodostni hižo wot staroby 15 lět jězbnu dowolnosć za moped­ złožić. Zo móža kraje minimalnu starobu wot tuchwilu 16 na 15 lět trajnje znižić, dyrbja zakoń wo na­dróžnym wobchadźe změnić. Modelowe testy, tež w Sakskej a Braniborskej, pla­nuja hač do apryla 2020.

Rěča rěč wobydlerjow

Budyšin. Z certifikatom „Rěčimy rěč našich wobydlerjow“ je Budyski Klub wuchowarjow rěče krajnoradny zarjad wuznamjenił. Wosebje chwaleše sej wotpohlad, tež přichodnje runoprawosć splahow jako „woprawdźitu politisku naležnosć spěchować“. Předsyda Diethold Tietz je wopismo krajnemu radźe Michaelej Harigej (CDU) póndźelu na posedźenju wokrjesneho sejmika přepodał.

Zwěrjenc wuda swójski euro