Berlinske Serbske blido druhdźe
Krótkopowěsće (02.01.20)
Strony zwěsćeja wjace namocy
Drježdźany. CDU, SPD, Zwjazk 90/Zeleni, Lěwica a AfD su zdźělili, zo wjace namocy přećiwo stronam zwěsćeja. Hroženja, hida a nadběhi na politikarjow su z jich wida přiběrali. Statistika sakskeho nutřkowneho ministerstwa pak to cyle tak njewotbłyšćuje. Krajny kriminalny zarjad naliči 218 padow mjenje politisce motiwowanych chłostajomnych njeskutkow přećiwo politikarjam a stronam za lěto 2018 hač w předchadźacym lěće.
Karikaturist Bach zemrěł
Kamjenica. Po dołhej chorosći je Kamjeničanski karikaturist Rainer Bach silwester 73lětny zemrěł. Jako swobodnje skutkowacy wozjewi wón karikatury mjez druhim w satiriskim magacinje „Eulenspiegel“. Kosmonawt Gennadij Padalka bě w lěće 2015 rysowanku Rainera Bacha sobu na mjezynarodnu swětnišćowu staciju ISS wzał.
Industrijna kultura w srjedźišću
Angažowanych wobydlerjow počesćili
Slepo (CK/SN). Mjeztym pjaty króć je Slepjanska wjesna rada minjeny tydźeń „Slepjanske čestne myto“ spožčiła. Z nim česća wobydlerjow, „kotřiž su sej často hižo wjacore lěta bjez wulkeho činjenja z jich skutkowanjom w a wokoło našeje wsy, na dobro ludźi a našeje zhromadnosće zasłužby zdobyli, a kotrychž měli raz wosebiće počesćić“, wuswětli wjesny předstejićer Slepoho Wolfgang Goldstein. Wjesna rada so nadźija, zo je zjawne připóznaće pohon, zo bychu dalši jich přikład sćěhowali.
Policija (30.12.19)
Měrny posledni kónc tydźenja lěta
Kinspork/Slepo. Poměrnje měrny běše posledni kónc tydźenja lěta 2019 po informacijach policije w Hornjej Łužicy. Zastojnicy zwěsćichu nimo mjeńšich padustwow cyłkownje 30 wobchadnych njezbožow z jednej zranjenej wosobu. Nimo toho lepichu dweju šoferow – w Kinsporku a w Slepom –, kotrajž běštaj pod wliwom alkohola po puću. W Kinsporku bě wčera 77lětny ze swojim Mitsubishijom z křiwicy na polo zjěł a tam tčacy wostał. Policija chcyše pomhać a zwěsći „chorhojčku“. Test wunjese 1,8 promilow alkohola w kreji. W Slepom su zastojnicy wčera rano 21lětneho wodźerja Corsy kontrolowali a 0,6 promilow alkohola w jeho kreji zwěsćili.
Chór Meja koncertuje
Radwor. Hodowny a jubilejny koncert wuhotuje chór Meja składnostnje 125. róčnicy swojeho wobstaća sobotu, 4. januara, w Radworskim hosćencu „Meja“. Prěni započnje so w 15.30 hodź. Wot 15 hodź. poskića tam swačinu. Dalšemu koncertej w 19 hodź. přizamknu so reje z kapału Con-takt.
Silwester do cyrkwje
Baćoń. Hudźbny nyšpor z meditacijemi na kónc lěta budźe jutře w 19 hodź. w Baćonju. Kaž loni wuhotuja jón młodostni tamnišeje wosady.
Nowe wotewrjenske časy
Wojerecy. Měšćanski historiski archiw we Wojerecach budźe wot noweho lěta stajnje wutoru wot 10 do 12 hodź. a wot 14 do 16 hodź. wočinjeny. Póndźelu, štwórtk a pjatk budźe wón jenož po dorěčenju přistupny, srjedu wostanje začinjeny. Hač do 3. januara 2020 wostanje Wojerowski měšćanski historiski archiw zawrjeny.
Kupjel budźe zawrjena
Kamjenc. Kamjenska halowa kupjel wostanje silwester a Nowe lěto zawrjena, dźensa je hač do 18 hodź. přistupna.
„18, 20, preč“ znowa mócnje klinčało
Štyrjo škotowarjo prěnjeje hodźiny su hišće dźensa pódla, hdyž zarjaduja w Nowej Wjesce swój škot wo myta mjez hodami a Nowym lětom. Zajimawosć tónraz bě, zo bu chětro wjele hrow přěhratych.
Nowa Wjeska (ddy/SN). Kaž kóžde lěto mjez hodami a Nowym lětom zarjadowachu Nowowješćenjo zaso swój škotowy turněr. Za štyrjomi blidami je cyłkownje šěsnaće hrajerjow karty placało. A woni njeběchu jeno ze wsy a wokoliny do Nowowješćanskeho młodźinskeho kluba přichwatali. Samo z Radworja a Kulowa, kaž farar Gabriš Nawka, běchu škotowarjo přeprošenje sćěhowali.
Hižo w prěnim kole so pokaza, zo wutwori so jasne koło faworitow, mjeztym zo někotryžkuli ze starych zajacow podarmo za grandom honješe. Najlěpša a zdobom jenička žona bě Kira Hrjehorjec, kotraž praji: „Sym nětko hižo někotre lěta z přećelemi a znatymi tu pódla. A móžu přeco hišće něšto nowe přinawuknyć. To čini tutu hru tak zajimawu za mnje. Nimam žadyn strach, so z mužemi měrić.“
Z kameru dale po puću
Krótkopowěsće (30.12.19)
Serbska murja so schadźowała
Njechorń. Towarstwo Serbska murja je sobotu w Domje Měrćina Nowaka-Njechorńskeho swoju hłownu zhromadźiznu přewjedło. Wosebje zhladowali su na aplikaciju QuizSerb, serbski digitalny kwis, kiž běchu zdźěłali a kotryž wobstajnje z nowymi prašenjemi pjelnja. Na čoło předsydstwa wuzwolichu Pětra Dźisławka a Kiru Hrjehorjec.
Na škodu šulerjow
Berlin. Po cyłej Němskej na šulach mjeztym přidružnicy skutkuja. Prezident cyłozwjazkoweho zjednoćenstwa wučerjow Heinz-Peter Meidinger ma jich wukubłanje w rozmołwje z nowinu Die Welt za njedosahace a za „njeskutk na dźěćoch“, rěčo w tym prašenju wo „dospołnym zaprajenju“ zwjazkowych krajow. Často njejsu přidružnicy kwalifikowani dosć, hdyž šulsku słužbu nastupja.
Lěki jednotnje wotstronjeć
Čakaja na posudki fachowcow
Ralbicy (SN/JaW). Gmejnska rada Ralbicy-Róžant njeje na swojim zašłym posedźenju wčera tydźenja w Ralbičanskej starej šuli wjacore připowědźene naležnosće rozjimała. Kaž zastupowacy wjesnjanosta Michał Šołta (SWZ Delany) přitomnym zdźěli, njemóžachu hišće plany wo přetwarje tuchwilneje Ralbičanskeje pěstowarnje na hort předstajić. Jako přičinu wón mjenowaše, zo trěbne posudki fachowcow wo twarskim stawje domu dotal njepředleža. „Fachowcy su wšitke fundamenty, sćěny, wjerchi kaž tež třěchu přepruwowali. Zdźěla dyrbjachu za to hłuboke dźěry točić. Posudki tuchwilu zdźěłuja, z kotrymiž móžemy potom dalše postupowanje planować. 21. januara so dźěłowa skupina ,pěstowarnja‘ znowa zetka. Potom maja posudki předležeć. 23. januara chcemy dalše postupowanje a připowědźene plany w gmejnskej radźe předstajić. Časowy plan wutwara horta a nowotwara pěstowanje pak njeje wohroženy. „Ležimy derje w času a njeje ćežow“, Šołta rozłoži.
Policija (27.12.19)
Kolesy z pinčneho puklota kradnyli
Wojerecy. Njeznaći skućićeljo su so mjez 18. a 25. decembrom do pinčneho puklota wjaceswójbneho domu na Wojerowskej Alberta Einsteinowej zadobyli a z njeho dwě kolesy kradnyli. Nastata škoda wučinja nimale 2 000 eurow. Kriminalna policija je přepytowanje přewzała.
