Wo Biskopičanskich kulturnych ­zarjadnišćach wótrje diskutuja

Biskopicy (UM/SN). Zo móžeš kóždy euro­ jenož jónu wudać, je powšitkownje znate. To charakterizuje mjeztym tež diskusiju wo přichodźe kulturnych zarjadnišćow w Biskopicach, dokładnje tamnišeju kulturneho domu a bywšeho kina. Wyši měšćanosta Holm Große (njestronjan) začuwa naležnosć takle: „Za chětro wobmyslomne mam, zo je z pozitiwnych prócowanjow wo wuwiće našeho města mjeztym k destruktiwnemu rozmyslowanju w lěhwach přihłosowarjow rozdźělnych projektow dóšło.“ To wuwjercholi samo „w dźiwich teorijach wo zapřisahańcach w socialnych syćach“.

Wyši měšćanosta sam widźi jasne rozdźěle mjez projektomaj: „Z kulturnym domom dóstachmy woprawdźitu opciju za kulturu a zarjadnistwo, kotruž zhromadnje ze swojimi sobudźěłaćerjemi jako zhromadny měšćanski projekt zaměrnje pohonjam.“ Kino pak je „priwatne předewzaće, ke kotremuž mamy sej jako měšćanska rada a město jasny wobraz tworić, zo móhli z dobrym swědomjom rozsudźić. Wšako su srědki wobmjezowane.“

Budyšin. Na premjeru knihi „Dźiwadło njewidźomnych dźěći“ přeprosy wšitkich zajimcow Ludowe nakładnistwo Domowiny do Budyskeho Serbskeho gym­nazija na Friedricha Listowej. Srjedu, 11. decembra, předstaji tam přełožer Jan Měškank knihu Marcina Szczygielskeho. Započatk je w 9.40 hodź.

Dohodowny čas porjeńšić

Čorny Chołmc. Na adwentny koncert w Čornochołmčanskej Marinej cyrkwi přeprosytej tež lětsa zaso chór nałožkoweho towarstwa Krabat a Wojerowski šulski chór. Njedźelu, 15. decembra wot 16.30 hodź. chcedźa hudźbnicy a spěwarjo připosłucharjow ze swojimi poskitkami zwjeselić a jim tak dohodowny čas čakanja na přichad Chrystusa porjeńšić. Wšitcy su wutrobnje witani.

Frontalnje do so zrazyłoj

Delni Wujězd. Ćežke njezbožo sta so dźensa rano wokoło sedmich při wotbóčce na awtodróhu A 4 w Hornim Wujězdźe. Šoferka Toyoty ze směra Zejic chcyše na awtodróhu wotbočić, přewidźa pak z Wujězda přijěducy transporter. Jězdźidle zrazyštej frontalnje do so. Wodźerjow wobeju awtow dyrbjachu zranjeneju do chorownje dowjezć, wěcna škoda wučinja­ wjacore tysacy eurow.

Kulow (AK/SN). Po štyrjoch měsacach přestawki móža Kulowscy katolscy wěriwi swoje Bože mšě zaso w farskej cyrkwi swjećić. Z nutrnosću – po zakónčenju druheho twarskeho wotrězka – je tamniša wosada cyrkej minjeny pjatk wječor zaso do słužby stajiła. Zhorjelski biskop Wolfgang Ipolt dźakowaše so za pilnosć, prócu a swědomitosć kaž tež za njesměrnu wutrajnosć při wobnowjenju Božeho domu. Hižo loni běchu tepjenje modernizowali, cyrkwine ławki restawrowali a špundowanje ponowili kaž tež wołtarnišćo powjetšili. Lětsa w juliju zahajichu druhi twarski wotrězk. Cyrkej dósta nowe barbne wuhotowanje, kotrež jeje gotiski charakter wuzběhuje. Nimo toho instalowachu nowu swěcu a zwukowu techniku. Nastajili su tohorunja nowy ambo (čitanski pult) z łužiskeho zornowca. Namjet za to mějachu křižerjo. Woni darichu za njón pjenjezy z kolekty swojich jutrownych rańšich kemšow. „Za dupu smy cyle nowe městno wuhotować dali“, rjekny­ wjelelětny čłon cyrkwinskeje rady Pětr Šołta.