Derje, zo maja we Wojerecach přiradu za serbske naležnosće a zo so w njej wěcywustojni wobydlerjo wo serbskosć w měsće prócuja. Hižo tójšto su zdokonjeli, myslu jenož na serbske připowědźenje zastanišćow w busach. Tola sebi wotpočink słodźeć dać, to gremij nochce a pyta tuž wobstajnje za móžnosćemi, serbskosć w měsće dale do zjawnosće njesć. Prawje tak a dale tak, jim přiwołam. Za dobre mam tež, zo chcedźa so čłonojo w měšćanskich dźělach a na wsach, kotrež Wojerecam přisłušeja, zetkawać. Tak zeznaja so z tamnymi towarstwami, kotrychž čłonojo wšak za samsny postronk ćahnu kaž čłonojo přirady. Nimo toho zhonja tež wot angažowanych na bazy, hdźe snano črij trochu bóle tłóči a móža jim radu dać abo samo direktnje pomhać. Angažement přirady sej česću. Wšako jako nowinarjo tak tež zhonimy, što wšo so tam nastupajo serbskosć dobreho stawa, a móžemy pozitiwnje rozprawjeć. Janek Wowčer

Židźino (AK/SN). Přirada za serbske naležnosće města Wojerecy chce z komunalnymi zastupnikami, towarstwami a kulturnymi skupinami w měsće samym kaž tež w měšćanskich dźělach a na wsach­ intensiwnje hromadźe dźěłać. Prawidłownje chce gremij měšćansku radu wo swojim skutkowanju informować. Zdobom zasadźa so cyłk za dalewjedźenje koncepta 2plus na zakładnej šuli „Handrij Zeljer“ tež na nowym městnje. Tohorunja na tuchwilu hišće nastawacej nowej wyšej šuli we Wojerecach měli serbšćinu znajmjeńša jako cyło­dnjowski poskitk podawać. To podšmórny předsydka přirady za serbske naležnosće Evelin Graf na wčerawšim wuradźowanju gremija w Židźinom.

„Chcemy wuměnu nazhonjenjow nastupajo serbske temy z měšćanskimi radźićelemi. Wšako smy poradźowacy gremij“, rjekny předsydka. Po konstituowanju 30. oktobra a wčerawšim wuradźowanju chce sej gremij 15. januara swój klětuši dźěłowy plan zdźěłać. Jónu měsačnje chcedźa so čłonojo zetkać. Wažne jim je, zo du k tomu do měšćanskich dźělow a do wsow.

Druhi dźěl dopomnjenkow

Budyšin. W Ludowym nakładnistwje Domowina je nětko druhi dźěl memoarow Benedikta Dyrlicha „Doma we wućekach 2“ wušoł. W nim wěnuje so awtor časej po politiskim přewróće 1989 a wobswětla mjez druhim swoje skutkowanje jako parlamentownik a jako šefredaktor Serbskich Nowin. Knižna premjera budźe štwórtk w Smolerjec kniharni.

Přećiwo zhromadnej šuli

Radebeul. Zwjazk sakskich wučerjow je znowa před zhromadnej šulu warnował a tak debatu wo tule šulsku družinu znowa zahajił. Tajka ničo njeposkića, štož móže abo móhła wyša šula zdokonjeć, rjekny předsyda zwjazka Jens Weichelt wčera w Radebeulu. Jeho poselstwo na CDU, SPD a Zelenych, kotrež jednaja wo koaliciju, je, zo nimaja „wolerski nadawk za eksperimenty na šulskim systemje“.

Spěchowanje přizwolene

Naročnemu a wužadacemu nadawkej stajichu so gmejnscy radźićeljo na swojim oktoberskim zeńdźenju, jako wobzamknychu projekt k wutworjenju partnerskich poćahow mjez Njebjelčanskej gmejnu a komunu Ouidah w zapadoafriskim kraju Beninje.

Njebjelčicy (aha/SN). Hižo wjacore lěta, po tym zo je Njebjelčanski wjesnjanosta Tomaš Čornak (CDU) na mjezynarodnej turistiskej přehladce ITM w Berlinje ze­znał princa Dah Bokpê – mjeztym je wón kral w Ouidah –, haji a wudźeržuje Njebjelčanska gmejna přećelske zwiski do zapadoafriskeho Benina. Jako wopyta minjeny tydźeń štyričłonska delegacija z něhdźe 11 milionow wobydlerjow ličaceho kraja pod nawodom měšćanostki Célestine Clotaire Adjanohoun Njebjelčicy, zetka so wona z wjacorymi gmejnskimi radźićelemi a wuradźowaše wo wobsahu předwidźaneho projekta, wo jeho předstajenju na planowanym zajězdźe delegacije Njebjelčanow wot 6. do 15. decembra do Benina.