Wot 4. do 6. meje wotměja so w Němcach 44. wjesne swjedźenske hry. Na wopytowarjow čaka tež lětsa pisany program, kiž wobsahuje tónraz tež nowosće.
Němcy (SiR/SN). Znate dypki a nowosće wobsahuje program lětušich wjesnych swjedźenskich hrow, kotrež wot jutřišeho hač do njedźele w Němcach přewjedu. Znaty je na přikład wustup žónskeje rejwanskeje skupiny „Hot Weibs“, kotraž je ze swojimi poradźenymi choreografijemi hižo zašłe swjedźenje wobohaćała. Musku skupinu „Gurkenschieber“ wopytowarjo lětsa porno tomu njewuhladaja, kaž zastupowacy šef wjesneho kluba Handrij Korch přeradźi.
Po natočenju piwa a diskotece pjatk wječor smědźa so mali wopytowarjo sobotu wot 15.30 hodź. na bajkojte popołdnjo z wjele zwěrjatami wjeselić. Na to smědźa wjesne žony prěni raz nowe kehelowanišćo wužiwać. Dotalne je dlěje hač 20 lět dźeržało a dyrbješe so ponowić. Prěni raz na programje steja lětsa rjemjeslniske wiki, na kotrychž móža so domjace firmy předstajić a prezentować. Hosćo na přikład dožiwja, kak so kosa klepa a kak so pódkowy wobdźěłaja.
Wostrowc (AK/SN). Za někotre lěta budźe kóždy druhi wobydler Zhorjelskeho wokrjesa znajmjeńša 55 lět stary. „Runje tući ludźo pak su sej zdobyli wysoke kompetency w powołanju, swójbje a wólnym času. Chcedźa so angažować a woni maja za to chwile. „Trjebamy starych a jich nazhonjenja za přichod“, potwjerdźa dr. Michael Schlitt, předsyda Mjezynarodneho zetkawanskeho centruma Marijiny doł (IBZ), zańdźeny štwórtk we Wostrowcu. Tam wotměchu po zahajenju projekta Europskeje unije loni nětko druhu fachowu konferencu „Natwar kompetencneho teama 55+ w němsko-pólskim pomjeznym rumje“. Projekt traje wot lěta 2017 do 2019. Iniciatorojo a partnerojo za IBZ su agentura za regionalne wuwiće Kyrkonošow (Riesengebirgsregion KARR) z města Jelenia Góra w Pólskej. Za projekt móža nałožić 669 000 eurow. Z nich přińdźe 568 000 eurow ze spěchowanskich srědkow europskeho programa „Interreg Pólska-Sakska“. 101 000 eurow swójskeho podźěla njesetej kooperaciskej partneraj. Po intensiwnym wuhódnoćenju chcedźa zdźěłać brošuru z dokumentaciju.
Chorownja mjez mytowanymi
Drježdźany. Wjac hač 12 600 šulerjow z cyłeje Sakskeje wuži lětsa składnosć, so na akciji powołanskeje orientacije „Pohladaj nutř“ wobdźělić. Prěni raz je sakske ministerstwo za hospodarstwo, dźěło a wobchad dwanaće sakskich předewzaćow za swój angažement wuznamjeniło. Mjez nimi je Kamjenska chorownja maltezow swj. Jana.
Złota widlička za Salü
Zhorjelc. Na wólbach wo najlěpši hosćenc bě so loni 24 Zhorjelskich hosćencow wobdźěliło. Myto „Złota widlička“ dźělitej sej bara a hosćenc Salü a hosćenc Krishna, kotrejž běštej dóstałoj samsnu ličbu hłosow. Něhdźe 220 wužiwarjow kalendra z dobropisami bě so na wothłosowanju wobdźěliło. Gastronom Tobias Göhlich, kiž Salü na Čornej hasy nawjeduje, waži sej hódnoćenje hosći a ma je za „wobkrućenje a wulki pohon“.
Zwada wo móst radu pači
Rubiznu zaso namakali
Bambruch. Njeznaći zadobychu so w nocy na póndźelu w Bambruchu do bydlenskeho domu, kiž tuchwilu přetwarjeja. Z njeho pokradnychu wšelake mašiny a grat w hódnoće něhdźe 5 000 eurow. Póndźelu připołdnju zhoni policija po pokiwje swědka wo wosobowym awće typa BMW w Kamjencu, w kotrymž bě mjenowana rubizna. Awto słuša 35lětnemu mužej, kiž je policiji znaty.
Pančicy-Kukow (SN/MWj). Dobre hospodarske połoženje wotbłyšćuje so tuchwilu tež w tym, zo sej tójšto młodych swójbow swójski dom twari. Tež we wobłuku zarjadniskeho zwjazka Při Klóšterskej wodźe tajke twarnišća na mnohich městnach wuhladaš. W gmejnje Pančicy-Kukow je naprašowanje za kmanymi ležownosćemi tohorunja wulke, předewšěm w Pančicach samych, dokelž skića tamniša infrastruktura najlěpše wuměnjenja za mnohe žiwjenske wobłuki. Wjesnjanosta Markus Kreuz (CDU) pak móže zajimcam lědma twarske ležownosće poskićeć, dokelž gmejna tajke prosće nima. To ma so nětko změnić.
Na swojim zašłym posedźenju w Lejnje je gmejnska rada wobzamknyła, zo ma mjez tankownju při statnej dróze S 100 a Srjedźnym pućom městnosć za nowe jednoswójbne domy nastać. Dokelž leži něhdźe 2,3 hektary wulka płonina w tak mjenowanym wonkownym wobłuku, dyrbja ju najprjedy do nutřkowneho wobłuka zapřijeć. Za to je trěbny twarski plan, kiž ma so nětko zdźěłać.
Budyšin. W Ludowym nakładnistwje Domowina wušła kniha „Row w serbskej holi“ změje jutře, štwórtk, w 19.30 hodź. premjeru w Budyskej Smolerjec kniharni. Trudla Malinkowa je wudała znate powědančko Marje Kubašec serbsce, němsce a pólsce. Stawiznarka wěnuje so w knize tohorunja stawizniskim pozadkam powědančka.
Projektowy chór zwučuje
Worklecy. Projektowy chór serbskich dźěći wobrubi Božu mšu lětušeho putnikowanja starych a chorych ludźi, kotraž budźe sobotu, 12. meje, w 14 hodź. w Róžeńće. Proba za to budźe sobotu, 5. meje, wot 9 hodź. do 14 hodź. we Worklečanskim Don Boskowym domje. Zajimowane dźěći su wutrobnje přeprošene sobu spěwać. Wšitcy, kotřiž rady na instrumenće hraja, njech jón tež na probu sobu přinjesu.
Boža mša wobornikow
Róžant. Dźakna Boža mša wohnjowych wobornikow z gmejnow zarjadniskeho zwjazka Při Klóšterskej wodźe budźe na swjedźenju swjateho Floriana pjatk, 4. meje, w 19 hodź. w hnadownej cyrkwi w Róžeńće. Kemše swjeći Drježdźansko-Mišnjanski biskop Heinrich Timmerevers. Wšitcy wobornicy kaž tež hosćo su na nju přeprošeni.
Budyšin (CK/SN). W Hornjej Łužicy bě w aprylu 20 084 žonow a muži bjez dźěła. To je 1 428 mjenje hač měsac do toho. Kaž šef Budyskeje agentury za dźěło Thomas Berndt praji, je bjezdźěłnosć samo spěšnišo woteběrała hač wočakowane. To je wuskutk nowonastatych dźěłowych městnow, po połojcy pak tež wuskutk demografiskeho wuwića. Mjeztym zo je kwota bjezdźěłnosće w Radebergskim a Kamjenskim regionje pod štyrjomi procentami, štož po měnjenju fachowcow połnemu dźěłu wotpowěduje, wostanje wona w Zhorjelcu z dwanaće procentami a wulkim wotstawkom dale na wysokim niwowje konstantna.