„Kastanijowy dwór“ bórze zawru
Trjebin (AK/SN). Trjebin jako čłon turistiskeho teritorialneho zjednoćenstwa (TGG) Nysowy kraj chce so hišće bóle za turizm regiona zasadźeć. Na to bě gmejnski radźićel René Mettke a zastupjer komuny w TGG, na posedźenju tamnišeje gmejnskeje rady minjenu srjedu skedźbnił. „Za Hanza Šusterowy statok w Trjebinje na přikład nastawa tuchwilu memoryjowa hra, kotruž chcemy na turistiskich wikach wupołožić a wšelakim zarjadnišćam a institucijam přepodać.“ Hra, wosebje za dźěći nazornje a originelnje wuhotowana, wabi za turistiski cil, Hanza Šusterowy statok. Dalše motiwy memoryjoweje hry pokazuja mjez druhim Park hrabje Pücklera w Mužakowje, tamnišu lěsnu železnicu, wódne pućowanje po Nysy a dalše atrakcije. „Nadźijamy so, zo móžemy tak bóle na naš region skedźbnić“, René Mettke podšmórny, wopisujo hišće dalše přikłady.
Wo přichodźe ludu rěčeć
Njebjelčicy. Towarški a towaršojo, přećeljo kaž tež zajimowani wobydlerjo su jutře we 18 hodź. na zetkanje serbskopolitiskich kružkow a akterow CDU, SPD a Zwjazka 90/Zelenych w Njebjelčanskim gmejnskim zarjedźe přeprošeni. W rozmołwach a diskusijach a zhladowanju na politiku w Sakskej steji přichod serbskeho ludu w srjedźišću.
Elementarij wopyta hódny
Kamjenc. Kamjenski Muzej zapadneje Łužicy je mnohim, kotřiž su z přirodu a přirodoškitom kaž tež z archeologiju wusko zwjazani, dobra adresa. Tak su zajimcy jutře w 17 hodź. do domu witani, zo bychu swoje namakane kamjenje a fosilije posudźować dali. Jens Czoßek, muzejowy geologa, móže jim pomhać, chcedźa-li wědźeć, kotry kamjeń n. př. su sej z dowola při morju sobu přiwjezli.
Spominanje we wopomnišću
Budyšin. „Ohne Ruhe rollt das Meer“ rěka čitanje a koncert z Gerhardom Bausu a Stephanom Krawczykom srjedu składnostnje wotewrjenja stasijastwa Budyšin II před 30 lětami. Započatk je w 19 hodź., zastup darmotny.
Wo starych časach „sonić“
„Našej chorowni so wuznawamy“
Kamjenc (SN/mwe). Generalny społnomócnjeny pomocneje organizacije maltezow Karl Prinz zu Löwenstein je minjeny štwórtk zjawnje zdźělił, zo změje předań chorownjow maltezow tež w Kamjencu a Zhorjelcu lědma wuskutki za tam přistajenych. Wšitke dźěłoprawniske poměry wostanu, a wot zajimowanych kupcow wočakuja maltezojo nětko konkretne poskitki. Kaž zu Löwenstein tohorunja informuje, njeje žaneje alternatiwy k předani lěkowarnje. Wšako je tež pomocnym organizacijam dale a ćešo chorownje financować.
Krótkopowěsće (11.11.19)
Certifikat zakitowali
Budyšin. Spanskomedicinski labor w Budyskej chorowni Hornjołužiskich klinikow ptzwr (OLK) je certifikat za kwalitu struktury a procesow Němskeje towaršnosće za slědźenje a medicinu spara wuspěšnje zakitował. Wo tym OLK dźensa informuja. Na šěsć lěkowanskich městnach zastaruja spanskomedicinske schorjenja, štyri su za dorosćenych w medicinskej klinice II a dwě w klinice za dźěćacu a młodźinsku medicinu.
Kompetencny centrum wotewrěli
Choćebuz. We Łužicy dźěła nětko „myslenska fabrika“. Minjeny pjatk su kompetencny centrum w Choćebuzu wotewrěli. W nadawku zwjazkoweho wobswětoweho ministerstwa maja tam wědomostnicy rozrisanja wuwić, zo móhła industrija klimoneutralnje dźěłać. Tuchwilu ma centrum šěsć sobudźěłaćerjow, ličba pak ma na 14 rozrosć.
Tež Miłoraz zachować
Liča prěni raz z lochkim minusom
Kulowska měšćanska rada je na swojim posedźenju srjedu tydźenja hospodarski plan za komunalny lěs wobzamkła.
Kulow (AK/SN). Statny zawod Sakski lěs wobhospodarja w nadawku města Kulowa wobstatk měšćanskeho lěsa. „Prěni raz w běhu lět wupokazuje hospodarski plan we wuslědku lochki minus“, rozłoži zastupowacy nawoda Kulowskeho měšćanskeho wotrjada za twarstwo, přemysło a porjad Jurij Brösan, na wuradźowanju měšćanskeje rady. „Planujemy klětu stratu 721 eurow.“
Přičiny kritiskeho wuwića su sylne wichory minjenych měsacow kaž tež rozmnoženje skórnika po cyłych wobstatkach lěsa. „Před tydźenjomaj smy sej aktualny staw ze sobudźěłaćerjemi zawoda Sakski lěs na městnje wobhladali. Wulke škody mamy předewšěm w lěsach priwatnych wobsedźerjow. Ze swojim měšćanskim lěsom mamy hišće zbožo“, Jurij Brösan wuswětli. „Najebać to pak nimamy žane wulke žně drjewa předwidźane, dokelž su jeho płaćizny w pincy.“ Jeničce mjez delnimi Sulšecami a Tradowom, podłu dróhi mjez wsomaj, někotre štomy pušća, zo by wobchadna wěstota zaručena była.
Policija (08.11.19)
Z awta móšnju pokradnyli
Pančicy-Kukow. W Pančicach-Kukowje běchu so njeznaći srjedu rano do awta typa VW Passat zadobyli, kotrež bě na Dróze Ćišinskeho wotstajene, a pokradnychu z njeho móšnju.
Bjez rubizny ćeknył
Niska. Wčera rano je něchtó spytał na Nišćanskej Hrodowej wotstajeny Renault pokradnyć. Dokelž pak čuješe so wobkedźbowany, wón spěšnje ćekny.
Jeno z jednoho směra ke kupnicy
Wokrjes papjeru zlutniwje wužiwa
Budyšin (SN). Budyski wokrjes słuša w Němskej k tym, kotrež w swojim zarjadnistwje a domjacej ćišćerni trěbnu recyclowanu papjeru jako tu z wobswětowym znamješkom módreho jandźela zlutniwje wužiwaja. Z teje přičiny je sej Budyšin hromadźe z wokrjesom Offenbach w papjerowym atlasu 2019 iniciatiwy Za recyclowanu papjeru IPR šeste myto wubědźił. Wjace hač 12 000 produktow a posłužbow něhdźe 1 500 předewzaćow su z „módrym jandźelom“ woznamjenili. Při produkciji recyclowaneje papjery lutuja porno papjerje z čerstwych włoknin (Fasern) znajmjeńša 60 procentow wody a energije. Nimo toho zawinuja wo wjele mjeńši wustork wuhlikoweho dioksida. „Šeste městno nas wulce zwjesela, a mamy je zdobom za pohon. Přispomnić so ma, zo je Budyski wokrjes loni wužiwanja recyclowaneje papjery dla wjace hač 980 000 litrow wody a wjace hač 201 000 kilowattowych hodźin energije zalutował“, wuzběhuje přirjadnik krajneho rady Udo Wićaz (CDU).
Wječor za staršich
Chrósćicy. Starši a dalši zajimcy su dźensa w 19.30 hodź. k 4. fachowemu dnjej 2plus, kiž je jutře w Chróšćanskej „Jednoće“, na wječor „Zwěsćenje rěčneho stawa w serbšćinje“ přeprošeni. Rěčny staw ma so přichodnje we 8. lětniku přepruwować. Tež starši młódšich šulerjow móža so rady na přednošku wobdźělić.
Razantny folk w muzeju
Budyšin. Po dwěmaj lětomaj wustupi Edinburghska folkskupina North Sea Gas zaso w Budyšinje. Njedźelu ludźi trijo wot 19 hodź. w Budyskim Serbskim muzeju. Dožiwić móža zajimcy program „Voice of Scotland“. Dave Gilfillan, Ronnie MacDonald a Grant Simpson prezentuja na gitarje, banju, lutni a dalšich instrumentach jónkrótne aranžementy kaž tež nowu CD „Hearth & Homeland“.
Financy w porjadku
Staw hospodarjenja w Chróšćanskej gmejnje spokoja
Chrósćicy (JK/SN). Hłowny tema wčerawšeho poměrnje krótkeho zjawneho dźěla posedźenja Chróšćanskeje gmejnskeje rady běše rozprawa wo stawje lětušeho hospodarskeho plana gmejny.
Komornica Franciska Čapikowa předstaji radźićelam jasne wuwiće komuny we wobłuku financow. Staw gmejnskeho hłowneho konta w oktobrje njebě runje zwjeselacy, wšako je gmejna wšitke swoje, nic runje małe projekty předfinancowała, dokelž njeběchu spěchowanske srědki hišće dóšli. Aktualny staw a zbywace wudawki a dochody hač do kónca lěta pak zawěsća gmejnje wurunany staw na wšitkich pozicijach etata, kaž komornica wčera wobkrući. Wjetši wliw na wuwiće financow mějachu lětsa znowa wudawki za dźěći, kotrež drje w gmejnje bydla, ale w susodnych, kaž w Pančicach-Kukowje, do pěstowarnje abo žłobika chodźa. Tež woheń w juliju blisko Hórkow je njeplanowane wudawki zawinił, te pak gmejnu tak jara njewobćežuja.
