Za dawnymi slědami pytane
Wotrowske hrodźišćo znowa wědomostnicy přepytowali
Wotrow (SN/MWj). Starodawne Wotrowske hrodźišćo respektiwnje jeho wokolne łuki běchu tele dny znowa městno archeologiskeho a geologiskeho přepytowanja. Wotdaloka widźane móhł sej čłowjek minjeny pjatk myslić, zo tam něchtó skłoniny podłu puća do směra na Kanecy na starodawne wašnje ratarsce wobdźěłuje. Dwukolesaty nastroj, kotryž Patrick Mertl tam a sem ćišćeše, dopominaše skerje na samopasleny grat, z kotrymž móhł čłowjek pódu wobdźěłać.
Policija (03.04.19)
Bróžnja so dospołnje wotpaliła
Demjany. K hotowemu infernu wołachu wohnjowu woboru dźensa něhdźe w 4.30 hodź. do Demjan (Diehmen) pola Huski. Tam bě woheń w 50 króć 15 metrow wulkej bróžni wudyrił a twarjenje nimale dospołnje zničił. W bróžni bě nimo ratarskich mašinow něhdźe dwaceći swini, kotrež wobornicy před płomjenjemi wuchowachu. Sčasami wobornicy dosć hašenskeje wody njemějachu. Přičina wohenja njeje znata.
Njeje žane městno smjerće
Wjele ludźi je předwčerawšim popołdnju móžnosć wužiwało a so w Kamjenskej chorowni maltezow swj. Jana po tamnišej paliatiwnej staciji rozhladowało.
Kamjenc (aha/SN). Před pjeć lětami zarjadowana „Stacija Rafaela“ w Kamjenskej chorowni swj. Jana ze swojej agilnej wobsadku składnostnje póndźelneho dnja wotewrjenych duri přeswědčiwje pokaza, zo je tež tajkemu wužadanju zrosćena. Něhdźe 1 200 pacientow su tam wot časa załoženja zastarali. Nazhonita paliatiwna lěkarka dr. Cornelia Meißner, nawodna sotra stacije Karin Lauke kaž tež tam dźěłace dalše sotry móžachu mnohich wopytowarjow přeswědčić, zo njeje paliatiwna stacija městno smjerće. Wěnować so ćežko schorjenym, zo bychu jich bolosće znjesliwe byli, njetrjebawše čwěle so wobešli a zo bychu choremu přiwšěm wysoku žiwjensku kwalitu zaručili, wobhladuja wšitcy na staciji jako najwažnišu zasadu swojeho dźěła.
Dalše wobzamknjenja trěbne
Zhorjelski krajnoradny zarjad budźe na městnje rozšěrjeny
Zhorjelc (AK/SN). Zhorjelski wokrjes koncentruje swoje zarjadnistwa a fachowe zarjady přichodnje bóle w Zhorjelcu. Jako centralne stejnišćo měł twarski kompleks při Berlinskej, Dwórnišćowej a Salomonowej hasy słužić. To podšmórny komornik Zhorjelskeho wokrjesa Thomas Gampe. „Zarjadaj za wobswět a krajměrjenje, kotrejž stej tuchwilu w Lubiju zaměstnjenej, so do Zhorjelca nawróćitej. W měsće samym pak stejnišćo Lunitz zawru, socialny zarjad a jobcenter so tuž přesydlitej. Tež porjadniski zarjad změje swój domicil na nowym stejnišću. Zachować pak chcedźa zamołwići strowotniski zarjad, kotryž wostanje na Reichertowej zaměstnjeny“, komornik wuswětla.
Na centralnym městnje maja tuchwilu 350 sobudźěłaćerjow, a ličba ma wo 380 dalšich rozrosć. Wonkowne stejnišća saněrować by přenaročne a předrohe było. Wokrjes by za to znajmjeńša 3,8 milionow eurow nałožić měł.
Twar Choćebuskeje Sprjewineje mile so nachila. Tele dny su wosmy ...
Nowe ideje za wjesne kónčiny
Wuwiće wsow w Budyskim wokrjesu hladajo na wužadanja přichodnych lětdźesatkow tworješe srjedźišćo wčerawšeho zarjadowanja Radworskeje gmejnskeje skupiny CDU.
Radwor (SN/MkWj). Na forum w Radworskim hosćencu „Meja“ přeprosyli běchu sej čłonojo gmejnskeje skupiny CDU přirjadnika Budyskeho krajnoradneho zarjada Uda Wićaza, kiž je zdobom městopředsyda wokrjesneho zwjazka CDU. Na spočatku swojeho přednoška rysowaše wón dźěło krajnoradneho zarjada z cyłkownje 1 800 sobudźěłaćerjemi w Kamjencu, Budyšinje a we Wojerecach. Wopytowarjo tak mjez druhim zhonichu, zo je Budyski wokrjes hladajo na hospodarsku wukonitosć sobu najsylniši po wšej Sakskej. Solidny etat, snadne zadołženje a wysoka kwota inwesticijow to zmóžnjeja. Přiwšěm njetrjeba so wokrjes hladajo na spěchowanje kultury, sporta a na socialne wudawki chować. Runje tu pak chowaja so tež rizika, na přikład při spěchowanju swójbow, kotrež njemóža wšědne žiwjenje hižo same zmištrować. Wudawki w tym wobłuku su so z mjeztym 25 milionami eurow minjene lěta runjewon podwojili. Tendenca dale přiběra.
Krótkopowěsće (03.04.19)
Myto Astrid Lindgren spožčene
Stockholm. Belgisko-flamski spisowaćel Bart Moeyaert je lawreat lětušeho Myta Astrid Lindgren za dźěćacu a młodźinsku literaturu. To zdźěla Šwedska rada wuměłstwa. Najwuznamniše myto toho razu je ze 490 000 eurami dotěrowane. Mjez dohromady 246 kandidatami běštaj tež čěski ilustrator Petr Nikl a němski awtor Janosch (Horst Eckert).
Wšitke městna wobsadźene
Budyšin. Za kubłansku wuprawu wuměnkarjow Serbskeho šulskeho towarstwa wot 5. do 9. meje do Wendlanda bě za krótki čas wšitkich 44 městnow wobsadźene. Kurator Choćebuskeho Serbskeho muzeja Werner Měškank je zestajał program „Na slědach słowjanskich stawiznow we Wendlandźe“. Tamniše towarstwa a měšćanosta Łuchowa (Lüchow) Manfred Liebhaber wočakuja hosći z wosebitym programom.
Šiman: Spěšnje jednać
Kandidaća so předstaja
Budyšin. „Waše a naše ideje, zhromadnje za Budyšin!“ rěka hesło wólbneho programa Budyskeje SPD za wólby tudyšeje měšćanskeje rady a wjesnych radow 26. meje. Jutře, 3. apryla, w 17.30 hodź. chcedźa w rumnosćach Dźěłaćerskeho dobroćelstwa (AWO) na Lubijskej dróze 50 w Budyšinje swój program rozłožić. Tam předstaja so tohorunja kandidaća strony za komunalne wólby, mjez nimi Serbja.
„Mały Muk“ na jewišću
Budyšin. Štóž njeje dotal hišće najnowše předstajenje serbskeho dźěćaceho dźiwadła NSLDź „Mały Muk“ widźał, móže to jutře, srjedu, nachwatać. Znatu bajku předstaja w 14 hodź. w Budyskim Dźiwadle na hrodźe.
Na dalšu bjesadu
Drježdźany. Serbja w Drježdźanach su přeprošeni na dalšu serbsku bjesadu. Wona wotměje so zajutřišim, 4. apryla, w 19 hodź. w hosćencu „Altes Wettbüro“ na Antonowej 8. Hosćenc namakaja zajimcy mjez Albertowym naměstom a nowomešćanskim dwórnišćom.
Porěči wo biotopach
Policija (02.04.19)
Firmje tójšto škody načinili
Brězyna. Bližace so nalětnje dźěła w zahrodkach běchu snano přičina, zo su so njeznaći w nocy na minjenu njedźelu do firmy w Brězynje (Brösa) pola Malešec zadobyli. Tam pokradnychu woni wjacore poměrnje drohe motorske piły, motorske kosy a wšelke z akuwom ćěrjene zahrodkarske graty w hódnoće 15 000 eurow. Nimo toho načinichu skućićeljo tójšto dalšeje wěcneje škody, kotruž trochuja na něhdźe 4 000 eurow.
Nowe rumnosće zbrašenym
Pančicy-Kukow (SN/MWj). W bywšim bydlenskim domje na tak mjenowanym Kukowskim dworje so připowědźeja klětu a 2021 wobšěrne twarske dźěła. Klóšter Marijina hwězda móže tam přidatne wučbne rumnosće za swoju spěchowansku šulu wutworić. Dohromady chce klóšter za nje w přichodnymaj lětomaj nimale 700 000 eurow nałožić.
Za projekt je přirjadnica Budyskeho krajneho rady Birgit Weber abatisy Gabrieli Hesse minjeny pjatk spěchowanske přizwolenje přepodała. Srědki pochadźeja z programa „Witalne wjesne srjedźišća“ sakskeho ministerstwa za wobswět a ratarstwo. Tak spěchuje wone 75 procentow twarskich kóštow, potajkim něšto wjace hač 510 000 eurow. Kaž zarjadniski nawoda klóštra Chrystof Mikławšk rozłoži, nastanu w dotal njewužiwanym domje mjez druhim rumnosće za ručne dźěło. Tak so wuměnjenja za šulu jara polěpša.
