Wojerecy. Dohodowny čas je nimale wšudźe zdobom čas adwentnych wikow. Tež we Wojerecach je hižo z dobrej tradiciju tajke wuhotować. Tamniše Teschenske wiki wotewru jutře, pjatk, w 16 hodź. Hač do njedźele móža sej zajimcy na staroměšćanskim torhošću – pjatk a sobotu hač do 22 hodź. a njedźelu hač do 20 hodź. – dohodownu atmosferu při rozmołwje a słódnym horcym winje lubić dać.

Adwent w starej wowčerni

Stróža. Na popołdnjo wosebiteho razu sće jutře, pjatk, na dwór biosferoweho rezerwata­ Hornjołužiska hola a haty w Stróži witani. Zarjadnistwo rezerwata a čłonojo serbskeho towarstwa Radiška su za 3. adwent nimo hudźby něšto k paslenju za dźěći spřihotowali a po­skića tež wšelake regionalne wudźěłki. Kupić móžeće sej tam mjez druhim hodowny štomik z łužiskich lěsow.

Pasla hodowne dariki

Worklecy. Na zhromadne paslenje hodownych darikow su šulerki a šulerjo 6. do 8. lětnika sobotu, 14. decembra, wot 9 hodź. do Worklečanskeho Don Boskoweho­ domu přeprošene/přepro­šeni. Za paslenski material zběraja zamołwići na wobdźělnika dźesać eurow.

Je zaso čas hrow

Wopiteho zadźeržał

Bluń/Bjezdowy. Mjez Blunjom a Bjezdowami je so Blunjanej poradźiło wopiteho šofera zadźeržeć, a to wutoru rano. Krótko do sedmich informowaše wón policiju wo njewšědnym jězbnym stilu před nim jěduceho. Zastojnikam šofer Kije na to­ wuzna, zo bě njezbožo zawinił. Wón měješe 1,56 promilow alkohola w kreji. Zawěsćili su policisća zdobom na njezbožo pokazowace slědy. Jězbnu dowolnosć mužej nablaku sćazachu.

Łaz (AK/SN). Po wjac hač jednym lěće saněrowanja hotuje so ewangelska cyrkej we Łazu na znowaposwjećenje swojich pišćelow. Instrument je produkt twornje Ladegast-Rühlmann z lěta 1872, kaž čłon Łazowskeje wosadneje rady Günter Wjenk potwjerdźi.

Tuchwilu zatwarjataj sobudźěłaćerjej Budyskeje pišćeletwarskeje firmy Eule Friedemann Birke a Lukas Neumann techniku do instrumenta. Po tym mataj dalšej kolegaj pišćałki do njeho zatwarić a je hłosować. „Łazowske pišćele restawrować je chětro naročne“, rozłoži pišćeletwarc Friedemann Birke. „Chcemy wšak poprawnu techniku w dalokej měrje zachować. Wuměnjamy tuž jenož dodźeržane dźěle.“ Wjacore dźěle pedalowych tastow su hižo wuměnili. Na tak mjenowanym „hrajnym blidźe“ su tohorunja furněry ponowili. Sobu najćeši a najnaročniši krok bě, tak mjenowane powětrowe wokeńcy (Windladen) natwarić. Te dyrbjachu w Budyskim zawodźe Eule wobnowić. Nimo toho mějachu we Łazu tójšto detailowych dźěłow zmištrować. Dźěle mechaniki pišćelow su to­horunja wobnowili. Znowa zadźěłali su měchawu.

Wjesny centrum wostanje w rukach Hamorskeje gmejny

Hamor (CK/SN). Z jednym hłosawzdaćom je gmejnska rada Hamor spočatk tydźenja wobzamknjenje stareje gmejnskeje rady wo předani tamnišeho wjesneho centruma zběhnyła. Inwestor chcyše bywšu pěstowarnju na hladane bydlenja w starobje přetwarić. 18. oktobra pak wón swój poskitk, objekt kupić, nadobo cofny. Za přičinu inwestor měješe, zo by zwoprawdźenje projekta z njesměrnje wjele přidatnymi kóštami zwjazane było, kotrež njeběchu do toho tak spóznajomne. Tohodla njemóže swoje předewzaće hospodarsce zwoprawdźić, kaž komornik Ulrich Bänsch gmejnskim radźićelam nětko rozłoži.

Twarjenje, ke kotrehož předani mějachu hižo w starej gmejnskej radźe rozdźělne měnjenja, wostanje tuž najprjedy raz swójstwo Hamorskeje gmejny. Kaž wjesnjanosta Achim Junker (CDU) rjekny, maja­ hižo prěnje mysle a namjety, kak móh­li z objektom dale postupować. To pak su „njelehnjene jejka, wo kotrychž njemóžemy hišće rěčeć“.