Konsens za wšěch žadany
Gmejna Trjebin skedźbnja Sakski wyši hórnistwowy zarjad w Freibergu na poćežowanja z Wochožanskeje wuhloweje jamy.
Trjebin (AK/SN). Přizwolenje wosebiteho zawodneho plana wo škiće před imisijemi předewzaća Łužiska energija a milinarnje (LEAG) za Wochožansku wuhlowu Trjebinska gmejnska rada bjeze wšeho njeakceptuje. To wujewi diskusija na jeje minjenym posedźenju. „Dyrbimy konsens namakać, z kotrymž stej wobě stronje – wot hórnistwa potrjecheni wobydlerjo kaž tež energijowy koncern LEAG – přezjednej“, bě facit gmejnskich radźićelow. Swoje stejišćo zastupowali su tež napřećo přitomnemu zamołwitemu wobdźěłarjej Freibergskeho Sakskeho wyšeho hórnistwoweho zarjada za wotkrywanje Wochožanskeje a Rychwałdskeje jamy Frankej Brumme. Wón rozłoži radźićelam procedury schwalenja a pruwowanjow. Zawjazowacy w padźe Trjebina njeje zwjazkowy zakoń wo škiće před imisijemi, ale zwjazkowy hórnistwowy zakoń. Frank Brumme znaje poćeženja, kotrež wuhlowe jamy ze sobu přinjesu. Wšako bydli sam blisko jamy pola Schleenhaina južnje Lipska.
Něhdźe sto porcijow wobjeda nětko wob dźeń w Ralbičanskej ...
Wužiwajće pomoc!
Krótkopowěsće (30.03.20)
168 inficěrowanych we wokrjesu
Budyšin. Přez kónc tydźenja je ličba z koronawirusom natyknjenych w Budyskim wokrjesu wo 45 na 168 přiběrała. Wjetšina z nich su přiwuzni hižo inficěrowanych. W karantenje je tuchwilu 741 ludźi. Dalši schorjeny je zaso strowy, tak zo mamy mjeztym cyłkownje dwanaće wustrowjenych we wokrjesu. Třo pacienća su aktualnje w chorowni.
Łužiski přinošk ze šansu na myto
Drježdźany. Hačrunjež za 4. a 5. junij planowane Němsko-Pólske medijowe dny wupadnu, ma so 23. wubědźowanje wo žurnalistiske myto Tadeusza Mazowieckeho přewjesć. Mjez cyłkownje 29 zapodatymi namjetami ma tež přinošk Romana Nuka „Na dobre susodstwo – Kak dale po 15 lětach rozšěrjenja EU“ šansu na wuznamjenjenje.
Tež w Błótach turizm ćerpi
Podstupim. Aktualna strowotniska situacija so tež na turizm we Łužicy wuskutkuje. Po informacijach Němskeho zwjazka hotelow a hosćencow woznamjenja 800 000 pobrachowacych přenocowanjow jeničce w aprylu deficit cyłkownje něhdźe 50 milionow eurow. Błótowski turistiski zwjazk w tym zwisku wuzběhnje, zo je tuchwilu něhdźe 300 čołmarjow w Lubinje bjez dochodow.
Přetorhnu zahajeny projekt
Budyšin. Wobchad w Budyskim nutřkownym měsće ma přichodnje lěpje běžeć. Měšćanske zarjadnistwo je tuž spočatk měrca wobchad wobkedźbować dało. Aktualne połoženje pak dalše postupowanje njezmóžnja, kaž ze zarjadnistwa rěka. Woteběracy wobchad tuchwilu realitu njepokazuje, a tak njejsu žane woprawdźite ličby wočakować. Hdy chcedźa zwěsćowanje datow dale wjesć, dotal jasne njeje. To zwisuje z wuwićom naprawow přećiwo koronawirusej.
Prosy ludźi wukaz sćěhować
Wojerecy. Wojerowski wyši měšćanosta Stefan Skora (CDU) je na internetnej stronje města widejowe poselstwo wozjewił. W něšto dlěšej hač dwuapołminutowskej powěsći namołwja wón Wojerowčanow, so na postajenja nastupajo wotstawk mjez ludźimi dźeržeć a hygieniske pokiwy sćěhować. Dale Skora wo mjezsobnu solidaritu a pomocliwosć prosy. A jako třeći dypk wón naspomni, zo měli dźakowni być tym, kotřiž jako zastaraćeljo ludźi ze žiwidłami a dalši słužbu wokonjeja, a předewšěm sobudźěłaćerjam na medicinskim polu, mjez druhim we Wojerowskim klinikumje.
Turněr wotprajeny
Policija (27.03.20)
Njewočakowana překwapjenka
Zhorjelc. Zhorjelscy zarjadnicy so wutoru njemało dźiwachu. Jako k swojim awtam přińdźechu, witaše jich wóń kwětkow. Njeznaći běchu pod woknotrějaki kóždeho policajskeho jězdźidła, kotrež stejachu před rewěrom na Gobbinowej, róžu tyknyli. Zarjadnicy dźakuja so nje-znatym darićelam za spodobne floralne hódnoćenja swojeho dźěła.
Wot ideje k biotopej
Wojerecy (SiR/SN). Wojerowčanka Dagmar Steuer je projekt do žiwjenja zwołała, na łukach štomy a kerki sadźeć. A je za swoju ideju dotal wjele připóznaća žnjała. Wotpowědnu ležownosć přewostaja wona ze swójskeho wobsydstwa. „Mam wulke wjeselo a začuwam, zo něšto dobre zdokonjam. Widźiš-li, kak sterilnje sej někotři swoju zahrodu wuhotuja, ale sej jabłuka z Južneje Afriki kupuja, da maš tola rozmyslować. Wobhladuju projekt tuž jako jara trěbny. Je to mój přinošk za wobswětoškit. Njeměli rěčeć, ale jednać!“ Mjeztym su wobydlerjo na 1,3 hektary wulkej priwatnej łuce njedaloko Němcow něhdźe 250 štomow, kerkow a dalšich rostlin nasadźeli.
Projekt najebać koronakrizu
Łužiski park błudźenkow we Wochozach je koronakrizy dla tuchwilu zawrjeny. Přiwšěm prócuja so sobudźěłaćerjo wo to, wobchować park w pomjatku wopytowarjow. Za to su wšelake akcije přihotowali.
Krótkopowěsće (27.03.20)
123 inficěrowanych we wokrjesu
Budyšin/Zhorjelc. Ličba wobkrućenych, z koronawirusom inficěrowanych we wokrjesu Budyšin je wo jědnaće na cyłkownje 123 wosobow přiběrała. Dohromady je tuchwilu 914 ludźi w karantenje. Strowotniski zarjad na to skedźbnja, zo su natyknjenja po cyłym wokrjesu a wšitke starobne skupiny potrjechene. W Zhorjelskim wokrjesu zwěsćichu cyłkownje 53 infekcijow, tam je dotal jedna wosoba zemrěła.
Online-poskitk Płomjenja
Budyšin. Wot wčerawšeho poskića Płomjo online-seriju „Krimije přećiwo wostudźe“. Krótke słuchohry redaktor Pětr Šołta doma ze swojimi dźěćimi nahrawa. „Njeńdźe wo profesionelnosć, ale wo to, na serbske teksty słuchać, je zrozumić a krimi prawje wuhódać. Za to kiwaja mjenujcy rjane myta.“ Pytajće na Youtube pod hesłom PŁOMJO.
6,7 milionow eurow za šule
Budyšin. Sakska natwarna banka je Budyskemu wokrjesej dohromady 6,7 milionow eurow za digitalizaciju w šulach přilubiła. Pjenjezy maja so hač do lěta 2024 za „lěpšu digitalnu infrastrukturu na cyłkownje 30 šulach w nošerstwje wokrjesa“ nałožić, w zdźělence krajnoradneho zarjada rěka.
Policija (26.03.20)
Psyca zaso doma
Wuskidź. Wutoru wječor wuhlada policija na zwjazkowej dróze B 115 pola Hole samotneho psa a jeho popadny. Po rešerši za wobsedźerku podachu so k jeje adresy, žona pak doma njebě. Tak dyrbjachu psycu sobu na rewěr wzać, hdźež so krótko na to mějićelka přizjewi a swojeho lubuška sobu domoj wza.
Rozestajenje při durjach
Rakecy. Na Kaponičanskej hasy w Rakecach je so wobydler wopytowarjej do puća stupił. 54lětny nochcyše 33lětnemu do domu zastupić dać, dokelž tam njebydli. Tak dóńdźe k ćělnemu rozestajenju mjez mužomaj, při čimž so młódši lochko zrani. Nimo toho wjedźeše zwada k wobškodźenju zachodnych duri. Policija wo to prosy, zo bychu so potrjecheni w tajkich padach na zastojnikow wobroćili, kotřiž njejasnosće wuswětla.
Zetkanku rozpušćili
