Busowe dwórnišćo zawrjene
Budyšin. Spočatk lětnich prózdnin Budyske busowe dwórnišćo na tři tydźenje dróhotwarskich dźěłow dla zawru. W tym času zarjaduja prowizoriske zastanišća na Mukowej kaž tež mjez Walskej a Bebelowym naměstom. Wot 29. julija budźe busowe dwórnišćo zaso wužiwajomne. Potom wotrězk mjez Mukowej a Liebknechtowej dospołnje zawru.
Na štomy kedźbować
Budyšin. Měšćanske zarjadnistwo Budyšin skedźbnja na to, zo móhli so při tuchwilnej suchoće wot wonkownje strowych štomow nadobo hałzy wotłamać. Přičina je, zo po lońšim suchim lěću deficit wody dawno hišće narunany njeje. Zo bychu njetrjebawšim rizikam zadźěwali, njeměli ludźo dlěši čas pod štomami w parkach abo druhdźe přebywać. Štóž potajkim chłódkojte městno pyta, měł stajnje sobu na štomy kedźbować. Za to nastajeja nětko tež wotpowědne taflički.
We wsy wjacore projekty
Akciju „Čiń sobu“ Chróšćenjo po słowje brali
Chrósćicy (JK/SN). Mnohe aktiwity su so we wobłuku sakskeje iniciatiwy „Čiń sobu“ wuwili. Na najwšelakorišich polach su aktiwni a na wuspěšnym wuwiću zajimowani wobydlerjo tež serbskich gmejnow swoje ideje a předstawy wo přichodźe swojich wsow a žiweje dwurěčnosće zapodali. Jedna z aktiwnych a po mytowanju dosć wuspěšnych gmejnow je Chróšćanska. Nimo wjacorych mytow w kategoriji „Žiwa dwurěčnosć“, hdźež wosebje młodostni aktiwity wuwiwachu, je so gmejna z mytom w kategoriji „ReWIR“ za ciwilnotowaršnostny angažement we łužiskim a srjedźoněmskim rewěrje z Drježdźan nawróćiła.
Požadali běchu so Chróšćenjo z projektom „Wutworić móžnosće wočerstwjenja a zetkawanja na centralnych městnach gmejny“, kotryž běchu hižo loni we wobłuku iniciatiwy SIMUL Sakskeho ministerstwa za wobswět a ratarstwo zapodali. Bohužel njeběchu w tym wubědźowanju wuspěšni, ale ideja wosta. Tak so znowa rozsudźichu swoje předewzaće prezentować, tónraz z wuspěchom.
Na zahrodźe wobchoda so zetkawali
Něhdy bě w nimale kóždej wsy nakupowanišćo, hdźež poskićachu twory wšědneje potrjeby. Runočasnje běchu to socialne centrumy, hdźež so wjesnjenjo zetkawachu a rady pobjesadowachu. W našej lětnjej seriji na něhdyše wjesne wobchody dopominamy.
Dźensa: Jaseńca (2)
Jeno staršim Jasčanam je hišće znate, zo měješe we wsy napřećo něhdyšej Handrikec korčmje Mikławš Šołta hač do časa po Druhej swětowej wójnje wobchodźik za žiwidła. Hižo 6. februara 1947 je jón swojej dźowce Kaće přewostajił. Tehdy bě wobrotliwa a pilna žona 27 lět. Do toho je sej w Drježdźanach trěbne kupske kmanosće a znajomosće přiswojiła. Pozdźišo wuda so na Franca Wjeselu, tohorunja z Jaseńcy.
Intensiwnje a konstruktiwnje dźěłali
Zhorjelc (AK/SN). Zhorjelski wokrjesny sejmik móže na intensiwnu, konstruktiwnu, na rozsudy bohatu wólbnu periodu 2014–2019 zhladować. To je krajny rada Bernd Lange (CDU) wčera w Zhorjelcu bilancował. „Na 26 posedźenjach wokrjesneho sejmika smy 283 wobzamknjenjow schwalili. Nastorčili běchu je zarjadnistwo abo jednotliwe wuběrki, mějachmy tež 27 chwatnych rozsudow“, wuzběhny Bernd Lange na poslednim posedźenju legislatury. A dźakowaše so wšitkim wokrjesnym radźićelam za zdokonjane čestnohamtske dźěło.
Krótkopowěsće (04.07.19)
Rekordny wobrot docpěli
Kamjenc. Nimale 148 000 sakskich předewzaćow, kotrež wobrotowy dawk płaća, je w lěće 2017 nowy rekord wobrotow z dodawanjow a wukonow we wobjimje 138,6 miliardow eurow docpěło. Kaž Kamjenski statistiski krajny zarjad dźensa zdźěla, wučinja rozrost porno předlětu 7,8 miliardow eurow. Najsylniša branša bě znowa předźěłace přemysło.
Nowa nawodnica horta
Wojerecy. Nadine Wojtkowiak je nowa nawodnica horta „Při Worjole“ we Wojerecach, kotryž je w nošerstwje Křesćansko-socialneho kubłanskeho skutka Miłoćicy. Jeje předchadnica Marina Braske poda so po 43 słužbnych lětach na wuměnk, 29 lět je wona hort tamnišeje zakładneje šule „Handrij Zejler“ nawjedowała. Rozžohnowali a witali su jej šulerjo, starši a kubłarjo ze swjedźenjom.
Z bronzu so nawróćili
Třěcha je projekt cyłeje wosady
Twarnišćo na Chróšćanskim Božim domje wosebite wužadanje
Chrósćicy (SN/MWj). Dwaceći lět trajace přeće, třěchu Chróšćanskeje cyrkwje ponowić, so krok po kroku zwoprawdźa. Ke Chróšćanskej kermuši ma wona hotowa być, rjekny wosadny farar Měrćin Deleńk wčera na nowinarskej rozmołwje. Tuchwilu dźěłaja tam ćěslojo runje tak kaž třěchikryjerjo.
Policija (03.07.19)
Do garažow so zadobyli
Wojerecy. We Wojerecach dyrbjachu předwčerawšim zwěsćić, zo běchu so tam njeznaći minjene tydźenje do wjacorych garažow zadobyli. Z nich pokradnychu wubědźowanske koleso, kašćik z rjemjeslniskim gratom, nahłownik za motorskeho a surfowansku desku w cyłkownej hódnoće 1 700 eurow.
Na dnju pomnikow tola do „Króny“
Budyšin (SN). Dźeń wotewrjeneho pomnika je w Budyšinje kóžde lěto wulki podawk. Tón dźeń je nahladna ličba hewak zawrjenych domow a zarjadnišćow přistupna. Nimo toho organizuja wobšěrny kulturny poskitk. Zasadnje je program za dźeń pomnikow 8. septembra 2019 hižo zestajany.
Próstwu přećelow „Króny“, přednjesenu na zašłym posedźenju Budyskeje měšćanskeje rady, dom do dnja wotewrjeneho pomnika zapřijeć, je wyši měšćanosta Alexander Ahrens (SPD) najprjedy wotpokazał. Kaž měšćanske zarjadnistwo nětko zdźěla, su so po wjacorych rozmołwach dojednali, zo móže Budyska bydlenjotwarska towaršnosć (BWB) „Krónu“ nětko tola wočinić. Formalnje wona žadyn samostatny dźěl programa njeje, rěka w nowinskim wozjewjenju. Ale wobydlerjam ma so přiwšěm zmóžnić sej rumnosće „Króny“ wobhladać. K tomu praji Alexander Ahrens: „Tema ‚Krónu‘ za wobhladanje wočinić njeje žanoho wulkeho rozestajenjahódne. BWB a wobydlerska iniciatiwa móžetej ju tón dźeń wočinić, dokelž nochcemy wobhladanju areala naprěki stać.“
Wužijće składnosć
Krótkopowěsće (03.07.19)
Maja noweho wobhospodarjerja
Raduš. Słowjanske hrodźišćo w Radušu ma wot 1. julija noweho wobhospodarjerja. Zamołwitosć za archeologiski muzej je město Wětošow z měšćanskej firmu wot dotalneho nošerja towarstwa Słowjański grod Raduš z.t. přewzało. Z nošerstwom zwjazane su tež wšitke kóšty, wosebje za personal. Přichodnje chcedźa hrodźišćo bóle z dalšimi turistiskimi poskitkami regiona zwjazać.
Frakcija CDU skonstituowana
Budyšin. Frakcija CDU noweho Budyskeho wokrjesneho sejmika je so předwčerawšim skonstituowała. Dotalny předsyda Matthias Grahl z Wachauwa bu w zastojnstwje wobkrućeny, Radworčan Wincenc Baberška a Thomas Martolock z Kumwałda staj jeho zastupjerjej. Dawida Statnika z Ralbic, předsydu Domowiny, wuzwolichu za jednoho z dweju přisydnikow, kaž frakcija informowaše.
Winu přiznał
