Krótkopowěsće (24.02.20)
Tworja nowe rěčne rumy
Zły Komorow. Zajim za serbsku rěč a kulturu je minjene lěta w Złym Komorowje přiběrał. Nětko organizuje tamniša Domowinska skupina měsačne Serbske blido a zhromadne spěwanje. Prěnje Serbske blido su pjatk wotměli, zdźěli čłon skupiny Günter Pawliš. Tak chcedźa dalše serbske aktiwity wuwiwać, serbskorěčne rumy tworić a dwurěčnosć sylnić.
Lědma škody po wichoru
Lipsk. Wichorowa nižina „Yulia“ je w Němskej a w Hornjej Łužicy na zbožo mało škody zawostajiła. To wozjewi dźensa zasadźenski centrum nutřkowneho ministerstwa w Lipsku. Předewšěm w Vogtlandźe je wichor někotre štomy spowalał. Tež w Bolborcach dyrbješe wohnjowa wobora na milinowód padnjeny štom zrumować. Wosoby po informacijach centruma njebuchu žane zranjene.
Z ombudnikom njespokojom
„Ach mój swěće, domizna?!“
Chrósćicy. Takle mjenuje rodźeny Konječan Markus Bjeńš – bydlacy mjeztym sydom lět w Južnej Africe, hdźež za socialny projekt dźěła – swój přednošk jutře, sobotu, w 19.45 hodź. w Chróšćanskej putniskej hospodźe. Sam wón hosći takle na wječork wabi: „Zhromadnje z Wami chcu zhladować na swoje dožiwjenja a wučby zašłych sydom lět. Tak podajmy so přemyslujo, prašejo a rozmołwjejo so, spěwajo a přednošujo na zabawnu a dyrdomdejsku jězbu do swěta. Wotewrjena mysl a wutroba stej jako pućowanski prowiant lubje witanej.“ Hižo w 16 hodź. baje ćeta Monika dźěćom bajku „Njebojazny Jan“.
Njedźelu dźiwadło wupadnje
Budyšin. Předstajenje NSLDź „Dołhož fenki běža“, kotrež bě za njedźelu 23. februar, w 17 hodź. na hłownym jewišću jako hrabnjenčko planowane, chorosće dla wupadnje. Přichodne předstajenje budźe sobotu, 14. měrca, w 19.30 hodź. Poskića je tohorunja jako hrabnjenčko. Hižo kupjene zastupne lisćiki su za sobotu, 14. měrc, na samsnych městnach płaćiwe. Wone pak hodźa so runje tak za dalše předstajenja zaměnić.
Na knižnu premjeru
Policija (21.02.20)
Znowa so awto paliło
Budyšin. Na parkowanišću Budyskeho mebloweho domu Roller je so dźensa w nocy wosobowe awto wupaliło. Jako wobornicy přijědźechu, njemóžachu woni Seat Arosa hižo wuchować. Tež žiwy płót w susodstwje hižo w płomjenjach steješe. Wobornicy drje móžachu je spěšnje podusyć, awto pak je dospołnje skóncowane. Hakle minjenu njedźelu bě so cyle w bliskosći VW Polo palił.
Jězdźidła zhromadnje skazaja
Worklecy (SN/MWj). Něhdźe w meji 2021 dóstanje Smječkečanska wohnjowa wobora nowe hašenske awto. Worklečanska gmejnska rada je wčera wobzamknyła, zo kupja tak mjenowany MLF, potajkim srjedźne hašenske jězdźidło. To pak nječinja sami, ale w formje zhromadneje skazanki z Wojerecami, Njedźichowom a Halštrowskej Holu. Za to su štyri komuny zjawnoprawniske dojednanje wobzamknyli. Lěpšina je, zo dóstanu nimo normalneho spěchowanja hišće raz přidatne 20 procentow přiražki, rozłoži Volker Sanderhoff z Wojerowskeje powołanskeje wohnjoweje wobory. Ta ma za tónle projekt kłobuk na hłowje.
Sanderhoff wčera wuzběhny, zo su štyri komuny derje hromadźe dźěłali a zo njeje k někajkim njedorozumjenjam dóšło, wšako jedna so wo wěste standardne jězdźidła. Wone su samsneho typa a so lědma rozeznawaja, chiba snadnje w nutřkownym wuhotowanju. Cyłkowna inwesticiska suma za wšitke štyri jězdźidła wučinja něhdźe milion eurow. Dobra połojca toho budźe spěchowana.
Serbšćina na kubłanišću wažna
W juniju chcedźa w Čornym Chołmcu nowu pěstowarnju twarić započeć
Čorny Chołmc (AK/SN). Za zažne dźěćace kubłanje na wsy maja so wuměnjenja w Čornym Chołmcu přichodnje wo tójšto polěpšić. To rjekny přirjadnica Budyskeho krajneho rady Birgit Weber tam wčera na městnje, jako přepoda přizwolenje spěchowanskich srědkow za tamnišu nowu pěstowarnju „Krabat“. Projekt płaći 1,9 milionow eurow. Z toho přewozmjetej Dźěłaćerske dobroćelstwo (AWO) jako nošer a město Wojerecy něhdźe poł miliona eurow. 1,4 miliony eurow dóstanu ze sakskeho spěchowanskeho programa za witalne wjesne srjedźišća. Spočatk junija chcedźa twarić započeć, zdźěli nawoda twarskeho wotrjada města Wojerec Dietmar Wolf. Wón liči z tym, zo móhli nazymu 2021 zaćahnyć.
Zhromadnje lutować
Hosćo politisku ćahańcu dožiwili
Wurjadne posedźenje Budyskeho wokrjesneho sejmika ke Kamjenskej halowej kupjeli wotmě so wčera na namjet frakcije AfD. Wona nochcyše žadyn čas brojić, zo móhło zarjadnistwo přihoty za nowotwar kupjele nowowusměrjene dale wjesć. Frakcije Lěwicy, SPD a Zelenych pak su z mjeńšinowym namjetom po § 5, wotrězku 2, sadźe 2 hłownych wustawkow Budyskeho wokrjesa docpěli, zo bu naćisk wobzamknjenja AfD techniskemu wuběrkej dale daty.
Budyšin (SN/at). W swojich oranžojtych jakach su čłonojo Kamjenskeje wodoweje straže na městnach za hosći napadnyli. Woni pak běchu wo přeběhu posedźenja wokrjesneho sejmika přesłapjeni. „Smy sem přišli, zo bychmy nadrobnišo wo projekće zhonili. Wšako dźe wo naše dźěłowe městna“, bě wot nich słyšeć. Loni w rozmołwje běchu ze zastupjerjemi krajnoradneho zarjada swoje žadanja za nowu kupjel zwuraznili. Što pak z toho budźe? „Transparenca to žana njeje“, wodowi stražnicy wobžarowachu.
Krótkopowěsće (21.02.20)
Chcedźa młodźinu spěchować
Wojerecy. Na posedźenju přirady za serbske naležnosće města Wojerec wuradźowachu přitomni předwčerawšim wo tym, rozdźělić přiražki na móžne projekty wjesnych dźělow. Dźěło z dźěćimi a młodźinu jim wosebje na wutrobje leži. Tak přizwoli přirada podpěru młodźinskim klubam w Němcach, Brětni, Ćisku, Čornym Chołmcu a Hórnikecach.
Nowej rizikowej kónčinje FSME
Drježdźany. Dźeń a wjetši teritorij Sakskeje je po zastopnjowanju Roberta Kochoweho instituta rizikowa kónčina FSME – klěšćow dla. Najnowšej stej wot wčerawšeho město Drježdźany a Mišnjanski wokrjes. Budyski wokrjes ma hižo wot lěta 2018 status rizikoweje kónčiny FSME. Z cyłkownje dźesać sakskich wokrjesow a třoch wulkoměstow je mjeztym šěsć takle zastopnjowanych.
Tež Prascy Madźarojo narěčani
Chcedźa so sobu wo porjad a wěstotu starać
Serbscy młodostni dadźa so na policistow wukubłać
Tež sakska policija trjeba dorost. Wšako so přichodne lěta tójšto zastojnikow na wuměnk poda. Personalna situacija je w někotrych regionach swobodneho stata samo zdźěla chětro napjata. Sakska policija pyta tuž zaměrnje młodych ludźi. W rudnohórskim Schneebergu dadźa so tuchwilu tež třo Serbja na policistow wukubłać.
Žane mědlizanje
Hač do pjatka so přizjewić
Worklecy. Dźěćace a młodźinske dekanatne dušepastyrstwo přeproša dźěći 1. a 2. lětnika pod hesłom „Nowy spočatk“ sobotu, 29. februara, wot 9 do 15 hodź. do Worklečanskeho Don Boskoweho domu. Zajimcy njech so hač do jutřišeho pjatka pod telefonowym čisłom 035796/ 8 87 07 přizjewja.
Próstwy zapodać
Budyšin. Załožba za serbski lud skedźbnja na to, zo je 31. měrc 2020 posledni termin zapodaća próstwow wo přizwolenje spěchowanskich srědkow załožby za projekty w druhim połlěće 2020. Próstwy, kotrež po tutym terminje dóńdu, njehodźa so hižo wobkedźbować! Wobšěrne informacije, spěchowansku směrnicu a trěbne formulary namakaja zajimcy na internetnej stronje załožby pod http://stiftung.sorben.com.
Njedźelu dźiwadło wupadnje
