Hižo zranjeny z awtom znjezbožił
Halštrow. Po tym zo bě sej muž wčera wječor w Halštrowje z piłu do ruki rěznył, sydny so do awta a jědźeše k lěkarjej. Zranjenja dla pak zhubi w lěwicy měšćanskeho wobkruha we wysokosći nakupowanišća kontrolu nad wodźidłom a zrazy do štoma. Zawołani wohnjowi wobornicy z Halštrowa a Krěpjec městnosć njezboža zawěsćichu. Šofera je wuchowanska słužba zastarała.
Pola juwelěra kradnyli
Wojerecy. Na Wojerowskim Łužiskim naměsće běchu so njeznaći w nocy na póndźelu do juwelěroweho wobchoda zadobyli. Rozbichu tam witriny a pokradnychu časniki a debjenki. Škoda wučinja wjacore tysacy eurow. Hódnotu rubizny ma mějićel wobchoda hišće zwěsćić.
Budyšin (SN). Čłonojo chóra 1. serbskeje kulturneje brigady njech njeskomdźa zwučowanje štwórtk, 9. awgusta, kaž tež pjatk, 10. awgusta, wot 9.15 hač do 14.50 hodź. w SLA. Proby su wažne za wobrubjenje 100. posmjertnych narodnin židowki Hany, srjedu, 15. awgusta a za přihot nazymskeju koncertow.
Hudźbny tydźeń zakónčeny
Smochćicy (SN). 90 spěwarjow z cyłeje Němskeje, mjez nimi instrumentalisća, wobdźělichu so minjeny tydźeń na nětko hižo 16. Smochčanskim hudźbnym tydźenju. Pod nawodom prof. Wernera J. Patzelta a Huberta Gößweina woni hač do pjatka pilnje zwučowachu. W srjedźišću steješe skandinawiska chórowa hudźba. Wulkotny zakónčacy koncert sobotu wječor w Smochčanskej cyrkwi dožiwi 110 připosłucharjow.
Smjerdźaca (aha/SN). Do třidnjowskeho wohnjowoborneho swjedźenja minjeny kónc tydźenja zapřijachu 16. raz pospochi hašenske wubědźowanje. Tak nastupi njedźelu popołdnju jědnaće mustwow, mjez kotrymiž běštej dorostowa woborna skupina gmejny Ralbicy-Róžant a team młodeho čestneho čłona Pětra Krawca. Sudnicy Manfred Kral, Wolfgang Latta a Lukas Kreutz, kotřiž wuměnjenja na arealu „stadiona při dźiwjej rěce“ chwalobnje wuzběhnychu, su wukony swědomiće hódnoćili. Chwalobnje wo docpětych wuslědkach wuprajištaj so hłownaj sudnikaj Křesćan Bejma z Róžanta a nawoda Smjerdźečanskeje wobory Norbert Róbl.
Moderator wubědźowanja Helmut Liebs, hač do lěta 2002 zastupowacy hašenski mišter tehdyšeho Kamjenskeho wokrjesa, poda wjele zajimawych faktow wo wobdźělenych woborach. Mjeztym třeći raz wopokazachu so Smjerdźečanscy kameradojo – mjez nimi hakle 14lětny Marko Młodźink – jako najlěpši. Woni docpěchu wuběrny čas 35,20 sekundow. Druhe městno wobsadźichu Koćinjenjo, třeće Worklečenjo. Samo starši wobornicy ze Smjerdźaceje přeswědčichu a njeběchu posledni.
W druhej połojcy 19. lětstotka za čas industrializacije twarjachu tež w Hornjej Łužicy železniske čary. Runočasnje nastachu dwórnišća, stražniske chěžki a wuhibkarnje. W lětnjej seriji so rozhladujemy, kak trěbne wone něhdy běchu a što je so z nimi stało. (13)
Lětoń (CS/SN). Nic cyle telko za lětanje zahorjenych wopytowarjow kaž hewak bě minjeny kónc tydźenja na lětanske dny w Lětonju přichwatało. Na kóncu zarjadowanja zličichu organizatorojo „jenož“ 12 000 młódšich a staršich zajimcow, štož drje bě předewšěm sćěwk wulkeje horcoty dla. To je něhdźe třećina mjenje hač hewak. Najwjace fanow lětanja witachu njedźelu, hdyž běchu temperatury přijomniše a znjesliwiše.
Ličba wobdźělenych pilotow pak bě z połsta tak wulka, kaž dotal hišće ženje. Woni běchu ze 40 lětadłami přilećeli. Wopytowarjo, kotřiž w horcoće wutrachu, móžachu wjele powabliweho dožiwić. Mjez druhim móžachu z wosebitym čerwjenym helikopterom sobu lećeć. Mnozy přiležnosć wužiwachu, sej město Budyšin, wokolinu a nic naposledk swoje domske wothorjeka wobhladać.
Požadanski čas hišće wužić
Choćebuz. Załožerjo a młodźi firmownicy móža so hišće hač do 30. awgusta wo Łužiske myto załožerjow eksistency 2018 (LEX) požadać. Nimo třoch załožerskich mytow chce Łužiska hospodarska iniciatiwa hromadźe z IHK Choćebuz a Drježdźany, Choćebuskej rjemjeslniskej komoru, towaršnosću Inowaciski region Łužica a Łužiskim přichodom najlěpši koncept šulerskeje firmy mytować.
Silo w Njechornju so paliło
Njechorń. Ratarske płone silo je so wčera w Njechornju pola Wósporka paliło. Z dotal njeznateje přičiny je wokoło 20 hodź. kur k njebju stupał. Přiwołana wohnjowa wobora móžeše z pomocu teleskopoweho nakładowaka hač do nocy worštu po woršće wotnosyć a płomjenja podusyć. Zranił so na zbožo nichtó njeje. Policija nětko přepytuje.
Znački po přeću njewabja
Łaz (AK/SN). Časćišo bě zašłe měsacy při zwjazkowej dróze B 96 k mjerzanjam dóšło. Z Wojerec do Budyšina njemóžachu šoferojo pře Wulke Ždźary, hdźež bě dróha twarskich dźěłow dla zawrjena. Njedawno hakle su ju dotwarili a za zjawny wobchad zaso wotewrěli. Hač do toho pak wužiwachu mnozy „wodźerjo jězdźidłow lěsny pućik do noweje Bukojny, štož je wobydlerjow chětro poćežowało. Zhromadnje ze Staffi Bartuschk z porjadniskeho zarjada Łazowskeje gmejny smój na městnje rozłožiłoj, zo jedna so wo zjawny puć, čehoždla je tež wužiwajomny“, wuswětla wyša komisarka Kathrin Petsch. Wot apryla je 43lětna Wojerowčanka wobydlerska policistka w gmejnomaj Łaz a Sprjewiny Doł.
Z třomi promilemi chětro wopity
Leppersdorf. Blisko Leppersdorfa, na dróze do směra na Kleinröhrsdorf, je wčera něhdźe w 2 hodź. chětro wopity muž z kolesa padnył. Jako wot awtoweho šofera zawołani policisća 29lětneho kontrolowachu, woni zwěsćichu, zo měješe tón 3,22 promilow alkohola w kreji.
Budyšin (SN/JaW). Za zapadny dźěl Budyskeho wokrjesa přewozmje wot 1. januara 2019 firma NERU wotwožowanje smjećow. Wo tym informuje recyclingowe předewzaće w nowinskej zdźělence. „We wobłuku cyłoeuropskeho wupisanja je firma NERU najlěpši poskitk za wotwožowanje wotpadkow w zapadnym dźělu wokrjesa wotedała a přewozmje nadawk spočatk noweho lěta kaž planowane“, wobkrući našemu wječornikej na naprašowanje sobudźěłaćerka nowinskeho wotrjada Budyskeho krajnoradneho zarjada Dunja Reichelt.