Manfred Hermaš zaso předsydstwo SKT znowa přewzał
Manfred Hermaš je zaso předsyda towarstwa Serbski kulturny turizm. Jednohłósnje su jeho čłonojo cyłka minjeny pjatk na wólbnej zhromadźiznje w Rownom do zastojnstwa wolili.
Dźěłarnička z přednoškomaj a hru
Wosebitosće serbskeje rěče a móžnosće jeje nawuknjenja stejachu w srjedźišću dźěłarnički ewangelskich Bjesadow, kotraž wotmě so sobotu na Rakečanskej Pawołskej šuli.
Rakecy (GH/SN). Wot lěta 2013 zetkawaja so serbske ewangelske Bjesady z Bukec, Hodźija a Rakec jónu wob lěto k zhromadnej dźěłarničce. Sobotu bě Rakečanska Bjesada mjeztym druhi raz hosćićelka tohole zetkanja. Po hižo zwučenym wašnju zahajichu wobdźělnicy dźěłarničku z krótkej nutrnosću, kotruž nawjedowaše superintendent Jan Malink. Na žurli Pawołskeje šule móžeše wón nimale 30 wopytowarjow witać.
Hłowna a wólbna zhromadźizna ZSW zwołana
Budyšin (AW/SN). Předsydstwo Zwjazka serbskich wuměłcow pod nawodom jeho předsydy Istvána Kobjele je minjeny pjatk na swojim posedźenju w Budyšinje hłownu a wólbnu zhromadźiznu ZSW za 28. apryl 2017 wot 17 hodź. w Budyskim hosćencu „Zum Echten“ zwołało.
Hižo loni 18. nowembra bě ZSW w Haslowje hłownu a wólbnu zhromadźiznu přewjedł, na kotrejž poda předsystwo wobšěrnu dźěłowu a financnu rozprawu swojeje dwulětneje legislaturneje periody. Nowe předsydstwo njejsu wuzwolili, dokelž běštaj jenož dwaj čłonaj ZSW zwólniwaj za gremij kandidować. Wotpowědnje statutej towarstwa pak maja znajmjeńša třo kandidaća k wólbam k dispoziciji być. Z dotalneho předsydstwa njebě nichtó znowa kandidował. Wone pak bu w Haslowje zawjazane, čestnohamtsku funkciju hač do apryla dale wukonjeć a w tym času so za kandidatami rozhladować a jich zdobyć. Tuchwilu su štyrjo zwólniwi kandidować, jedyn z nich tež jako nowy předsyda ZSW. Dalši sobustawajo zwjazka wuměłcow móža hišće na wólbnej zhromadźiznje swoju kandidaturu přizjewić.
Na jara spodobne, žortne a informatiwne wašnje je Franc Čornak ...
Pobrachowacu serbšćinu kritizowali
Budyšin (SN/at). Lětuše planowane projekty stejachu w srjedźišću wuradźowanja předsydstwa župy „Jan Arnošt Smoler“ wčera w Budyskim Serbskim domje. Kaž regionalna rěčnica Domowiny za teritorij Budyskeje župy Sonja Hrjehorjowa na naprašowanje zdźěli, přihoty za swójbne popołdnjo zaměrnje postupuja. Zarjadowanje je za 18. nowember w Hodźiju předwidźane. Wothłós z gmejny je dosć pozitiwny, kaž zwěsćichu po prěnich rozmołwach z wjesnjanostu Geraldom Meyerom (njestronjan) a ze zastupjerjemi pěstowarnje a towarstwow.
Župne předsydstwo je so za cil lětušeje kubłanskeje jězby rozsudźiło. Tak podadźa so 23. septembra do Ochranowa. Dalši namjet, w reformaciskim lěće do Lutheroweho města Wittenberga jěć, njebu wot wjetšiny přiwzaty.
Ptačokwasne předstajenje Serbskeho ludoweho ansambla za dźěći w Budyšinje je mjez čłonami župneho předsydstwa pobrachowaceje serbskeje rěče dla kritiku zbudźiło. Woni wobžaruja, zo njeje zarjadowanje šulerjam, kotřiž serbšćinu wuknu, składnosć skićiło ju na jewišću w spěwach abo druhich dźělach programa SLA dožiwić.
Protesty žněja wulki wothłós
Online-peticiju za podpěru projekta Witaj dotal 560 ludźi podpisało
Budyšin (SN/JaW). Referent Domowiny za hospodarstwo Pětr Brězan budźe třěšny zwjazk přichodnje w brunicowym wuběrku Regionalneho planowanskeho zwjazka Hornja Łužica-Delnja Šleska kaž tež w jeho zwjazkowej zhromadźiznje zastupować. Wšitcy štyrnaćo přitomi čłonojo Zwjazkoweho předsydstwa Domowiny wuprajichu jemu minjenu sobotu dowěru. Brězan přewozmje nadawk wot Marka Kowarja. Změna bě trěbna, dokelž je Kowar wot spočatka lěta jednaćel třěšneho zwjazka.
Zahorjeny sportowc, wučer a zasłužbny Sokoł był
25. februara zemrě w 84. žiwjenskim lěće Miłočan Achim Kowar. Ze swójbnymi a přiwuznymi žaruja wosebje tež přećeljo serbskeho sporta. W rjadach Sokoła bě to w běhu jeno štyrjoch měsacow po Józefje Kilanku, kiž zemrě 9. nowembra, a Pětrje Šołće (2. februara zemrěł) třeće dźělenje wot prjedawšeho aktiwneho sportowca a sportoweho funkcionara.
Prěnja kročel
Wostanu swojemu hesłu swěrni
Ze słownikom slepjanšćiny „1 000 Slěpjanske słowa“ je Rownjanske towarstwo Njepilic dwór dołhodobny rěčny zakład stworiło.
Rowno (AK/SN). „Chcemy jón praktisce wužiwać a z nim naš kurs serbšćiny dale wjesć. Aktiwne rěčenje, tež na zarjadowanjach a wšědny dźeń, je nam wažne.“ Takle potwjerdźi to Manfred Nikel, wot załoženja 1999 předsyda towarstwa Njepipic dwór, na pjatkownej hłownej zhromadźiznje na Rownjanskim Njepilic statoku, w bilancy towarstwa za lěto 2016.
Jeho wutroba stajnje za serbski sport biła
W Budyšinje zemrě 22. februara w starobje 82 lět wučer, pedagogiski wědomostnik, aktiwny sportowc a sportowy funkcionar Pětr Šołta. Wo njeho žaruja mandźelska Marja, dźowce Jana a Nadja, přiwuzni, něhdyši kolegojo kaž tež wulka swójba přećelow serbskeho sporta.
Pětr Šołta narodźi so 24. awgusta 1934 w Njebjelčicach. Jeho nan bě hač do rozpušćenja Serbskeho Sokoła 1933 nazwučowar wjesneje jednoty. Wuchodźiwši zakładnu šulu bě Pětr mjez prěnimi šulerjemi w decembru 1945 załoženeho Serbskeho gymnazija w Českej Lípje. Tam započa so za kopańcu a lodohokej horić. Po přesydlenju wšěch serbskich wuknjacych spočatk 1947 do Varnsdorfa-Warnoćic je wón nimale kóžde swobodne popołdnjo za bulom honił. Hakle 13lětny smědźeše w mustwje serbskich studentow přećiwo wubrance Warnočanskich dźěłaćerjow sobu hrać.
