Přidatny rěčny rum za runohódnosć
Wojerecy (SN/JaW). Aktualny naćisk koncepta za konferencu wo strukturnym wuwiću Łužicy, kotruž chce Domowina w septembrje přewjesć, běše jedne ćežišćo wčerawšeho wuradźowanja prezidija Zwjazkoweho předsydstwa Domowiny we Wojerecach. „Chcemy zhromadnje z wokrjesami a łužiskej iniciatiwu dwudnjowsku konferencu přewjesć. Ćežišćo ma być serbsku specifiku při strukturnym wuwiću Łužicy wopisać a do hospodarskeho wuwića zapřijeć, kaž na přikład hódnotu serbšćiny“ rjekny předsyda Domowiny Dawid Statnik na naprašowanje našeho wječornika.
Nimo nałožkow tež sport wažny
Młodźinski aktiw Domowinskeje župy Delnja Łužica koordinuje aktiwity młodych Domowinjanow, na kotrychž wobdźěleja so runje tak dalši młodostni z městow a wsow. Lětuše ćežišća su tradicionalnej nałožkaj zapust a łapanje/zabiwanje kokota, koparski a volleyballowy turněr a kónclětne zarjadowanje z kehelowanjom w Rogowje.
Choćebuz (HA/SN). Podźěl Domowinjanow w młodźinskej starobje w župje Delnja Łužica je nahladny. Mjez něhdźe 40 skupinami a 25 towarstwami je tuchwilu dźewjeć młodźinskich z nimale 400 sobustawami. Wosebje w towarstwach a zjednoćenstwach su młodźi ludźo sylnje zastupjeni. Župa so tež prócuje, młodych čłonow a runje tak dalšich młodostnych na němsko-serbskich wsach do dźěła zapřijeć. Wo to stara so předewšěm župny młodźinski aktiw.
Lipa so w krajnej stolicy wuspěšnje předstajiła
Drježdźany (MeB/SN). Koncert ludowych pěsnjow a duchownych twórbow třoch spěwnych cyłkow je wčera wjace hač 300 připosłucharjow do Drježdźanskeje cyrkwje Třoch kralow přiwabił.
Zarjadowacy chór Slavica – lěta 2004 wutworjeny, nadkonfesionalny cyłk wěnuje so słowjanskej, přewažnje ruskej a ukrainskej wokalnej hudźbje – bě sej spěwarjow a spěwarki chóra Lipa z dirigentku Jadwigu Kaulfürstowej do krajneje stolicy přeprosył. Kontakt mjez cyłkomaj hižo někotre lěta wobsteji. Zhromadnje z mjezynarodnym dźěćacym chórom Libela wuhotowachu koncert k rusko-ukrainskim hodam kaž tež k nowolětnemu swjedźenjej.
We wupředatej cyrkwi přednjesechu Lipjenjo sep serbskich hodownych spěwow. Nimo woblubowanych pěsnjow Handrija Zejlerja, Michała Nawki a Bjarnata Krawca přeswědčichu woni tež z twórbu „Na hody“ Jana Bulanka. Wosebitu hodownu atmosferu wuprudźichu ze spěwom „Lubozne dźěćo“, kotryž zaklinča we wersiji za muski chór.
Zymska schadźowanka
Jolka tež w dwacetym lěće čiła
Radźeny jubilejny swjedźeń wjace hač 800 wopytowarjow přiwabił
Nuknica (SN/bn). Na jubilejny 20. jolka-swjedźeń je sobotu wjace hač 800 ludźi do Brězanec bróžnje w Nuknicy přichwatało. Wjelelětny moderator Marko Jurk witaše w mjenje wjesneho kluba, kotryž zarjadowanje wot wšeho spočatka organizuje, hosći z Łužicy a za jeje mjezami runje tak kaž z wukraja, mjez druhim z Čěskeje a Finskeje.
Hłownej temje programa běštej wjelča problematika kaž tež tak mjenowana postfaktiska doba ze swojim protagonistom Donaldom Trumpom.
Po tradicionelnym wašnju wustupištej muski kaž tež dźěćacy chór pod dirigatom wuměłskeho nawody swjedźenja Michała Cyža. Skupina žonow z Nuknicy, Prawoćic a Kopšina pokaza Kozaksku reju. Skeč „Černonawka a wjelk“ překwapi ze šibałej pointu, w kotrejž znaty zajac ruskich trikowych filmow takrjec ex machina problem rozrisa. SG Sněhowka wěnowaše so w swojim kabareće mafioznym strukturam tu a druhdźe a žněješe wulki přiklesk. Nimo toho su zarjadowarjo znowa kwis přewjedli a sej wospjet młodu spěwarku, Nukničanku Milenu Wowčerjec, na jewišćo přeprosyli.
Tež žony program přihotuja
Serbske Pazlicy/Njebjelčicy (SN/MWj). Dokelž su lětuše jutry 1. apryla poměrnje zahe, smědźa so tež přiwisnicy karnewala wjeselić, zo na nich hižo bórze norske dny čakaja. Tohodla je nětko tohorunja Serbskopazličanske karnewalowe towarstwo w horcej fazy přihotow swojich zarjadowanjow. Z princowskim porom Jensom I. a Sylviju I. z Frogmaniskeje přeprošeja Serbskopazličenjo na mjeztym hižo 48. karnewalowu sezonu, kotraž steji pod hesłom „Lóza huba čerwjena na póstnicach je košena“.
Prěni wjeršk na Njepilic statoku
Rowno (JoS/SN). Wot spočatka tohole tydźenja knježitej na Rownjanskim Njepilic statoku hołk a tołk. Tam přihotuja jutřiše swinjorězanje. Mjeztym 17. tajke zarjadowanje lubi zaso wulki wuspěch. Wutoru započachu kołbasu měšeć a do črjewow a škleńcow pjelnić. „Dźěła je dosć“, praji předsyda spěchowanskeho towarstwa Njepilic dwór Manfred Nikel. „Prócujemy so telko kołbasy dźěłać, zo nichtó z prózdnymaj rukomaj domoj hić njetrjeba.“ Nimale wšitkich 40 čłonow towarstwa je zapřijatych, wšako trjebaja rěznicy tójšto pomocnikow, šoferow, tepjerjow a žony, kotrež wulku ličbu napjelnjenych škleńcow sortěruja. Dalši wjesnjenjo tohorunja pomhaja. Za zhotowjenje kołbasy maja mjeztym nowe mašiny a připrawy, kotrež nětko hišće lěpje hygieniskim žadanjam nastupajo žiwidła wotpowěduja.
Organizuje, za čož so sam zahorja
Zo je minjenu njedźelu na Horje w Bóščanskej gmejnje zymske zetkanje přećelow oldtimerow mjez něhdźe tysac wopytowarjemi přewšo wulke připóznaće žnjało, je w prěnim rjedźe zasłužba Marija Ryćerja. Štwórte tajke zetkanje bě tamniši klub přećelow wlečakow mjeztym organizował. Wot časa załoženja je 47lětny Horjan předsyda 45 čłonow wopřijaceho cyłka.
W žiwjenjoběhu Marija Ryćerja ničo njewšědneho na to njepokazuje, hdźe a na kotre wašnje je sej přiswojił wobdźiwanjahódne organizatoriske kmanosće. 1970 w Nowej Jaseńcy rodźeny chodźeše prěnje lěta w Bóšicach a hač do 8. lětnika w Njeswačidle do šule. W Budyšinje nawukny powołanje rěznika. Jako tajki dźěłaše hač do oktobra minjeneho lěta w Budyskim Wjenkec rěznistwje, kotrež wudźeržuje na Horje swójsku rězarnju. Mjeztym dźěła Ryćer we Wětrowskim zawodźe Mammut.
Nowy započatk w Chróšćanskej dźiwadłowej skupinje
Chrósćicy (ZC/SN). Serbska lajska dźiwadłowa skupina Chrósćicy móžeše loni na swoje 40lětne skutkowanje po znowazałoženju 1977 zhladować. K róčnicy je wona zhromadnje z chórom Lipa a z někotrymi něhdyšimi čłonami rejwanskeje skupiny Wudworskeho folklorneho ansambla swjedźenske zarjadowanje wuhotowała. Přeprošeni běchu lubowarjo dźiwadła, kotrež su lajskich hrajerjow přez lěta swěrnje přewodźeli.
W běhu 40 lět zawjeselichu Chróšćenjo swój publikum ze 24 inscenacijemi. Po wjace hač štwórć lětstotku organizatoriskeho skutkowanja Zale Cyžoweje přewza lěta 2004 Gabriela Lebzyna wotežki. Z wulkim elanom, wušiknosću, wutrajnosću, z nowymi idejemi a runje tak akribiskej dokładnosću je wona hač do kónca minjeneho lěta za skupinu swoje mocy zasadźowała. Za dobry nawod a njesebičnu prócu, kotruž je na dobro skupiny a na dobro serbskeje kultury w běhu swojeho skutkowanja nałožowała, zasłuža sej wulki dźak.
Koncert a dźiwadło na swjedźenju
Hižo wot časa załoženja Bratrowstwa 1898 je z tradiciju, zo so čłonojo spočatk lěta po „lantagu“, hdyž tehdy čeledź słužbne městno měnješe, k zabawnemu zarjadowanju zetkawaja. Po znowazałoženju towarstwa su 1994 na staru tradiciju nawjazali a ju hač do dźensnišeho pěstuja.
Sulšecy (aha/SN). Městopředsyda towarstwa Handrij Rab witaše hosći minjenu sobotu na mjeztym 24. raz přewjedźeny woblubowany lětny swjedźeń na žurlu Sulšečanskeho kulturneho domu. Kaž kóžde lěto je so předsydstwo Bratrowstwa wo přewšo poradźeny program a wo dobru naladu starało.
