Turněr ze zajimawymi stawiznami
Lubowarjo škota cyłe lěto składnosć wužiwaja a so na turněrach najwšelakorišeho razu wobdźěleja. Ma-li pak tajki turněr dołhu tradiciju, je wón něšto wosebite, kaž wčera w Nowej Wjesce.
Nowa Wjeska (aha/SN). Za čas NDR mějachu někotři Nowowješćenjo, tehdy hišće w Čórlichec wjesnym hosćencu, ideju, přewjesć škotowy turněr. Dojednachu so na termin mjez hodami a Nowym lětom. Po zawrjenju hosćenca pak chcychu z kartyplacanjom na kóždy pad pokročować. Tuž so w tej abo tamnej priwatnej domjacnosći zetkawachu, druhdy přepołožichu turněr tež do Worklečanskeho hosćenca. Jako dóstachu młodostni po přewróće swój domicil na kromje wsy, wužiwachu jón tohorunja za škotowy turněr.
Djabołski kruh?
Serbske šulstwo w srjedźišću stało
W zmysle słowa so z wučerjom mjez ludom stał
Wukrančicy žaruja wo muža, kiž je poł lětstotka na dobro wsy skutkował. Minjeny kónc tydźenja su Wolframa Lorenca, wučerja a sportoweho horliwca, na wjesnym kěrchowje pochowali. Wolfram Lorenc, rodźeny 12. julija 1939 w Barće, bě po wjelelětnej ćežkej chorosći 26. nowembra zemrěł.
Syn wjesneho serbskeho dźěłaćerja chodźeše wot lěta 1953 na Serbsku wyšu šulu w Budyšinje. Po studiju wučerstwa na Serbskim wučerskim wustawje zasydli so we Wukrančicach. Jako wučer za serbšćinu a němčinu zasadźeše so wot prěnjeho dźěłoweho dnja lěta 1960 za serbsku wučbu w kónčinje, kotraž bě hižo tehdy nimale dospołnje přeněmčena a wuwiwaše tamnišu šulu sobu na nowočasne, we wsy připóznate kubłanišćo.
Pozitiwny trend dale dźe
Domowinska župa „Michał Hórnik“ Kamjenc dóstawa dalši přirost. Kaž předsydstwo župy informuje, chce dalše wjesne zhromadźenstwo regionalnemu cyłkej přistupić.
Nowa Wjeska (KJu/SN). Ličba čłonow Kamjenskeje župy „Michał Hórnik“ dale rosće a ma mjeztym wjac hač 1150 čłonow. Wo tym informuje předsydstwo Domowinskeje župy.
Brigada hotuje so na adwentnu prapremjeru
Budyšin (SN/CoR). „Lubi ludźo, to bě dołhi, napinacy dźeń a sće super sobu dźěłali.“ Z tymile słowami je so wčera popołdnju po cyłodnjowskej probje nawoda chóra 1. serbskeje kulturneje brigady Friedemann Böhme z młodymi spěwarjemi w awli Budyskeho Serbskeho gymnazija rozžohnował. Zwučowanje za tradicionalny adwentny koncert brigady kónc tydźenja w Budyskej Michałskej cyrkwi zakónči so z woblubowanej twórbu Georga Friedricha Händela „Dźowka Cion“, kotruž we wšěch móžnych rěčach a wšudźe rady zanošuja.
Wo wuznamje reformacije zhonili
Minjeny pjatk móžeše městopředsyda towarstwa Bratrowstwo nimale 40 čłonow na hłownu zhromadźiznu na Bosćanowej žurli Kulowskeje fary witać.
Sulšecy (aha/SN). Zhromadnje „Wótčenaš“ spěwajo spominachu na zemrětych w rozprawniskej dobje. Předsydka Sonja Hrjehorjowa gratulowaše čłonam ke kulowatym narodninam z małym darom. Mjez jubilarami bě čestny předsyda dr. Pětr Brězan, kiž bě 85ćiny woswjećił.
Wo dźěławosći chóra Bratrowstwa ze 26 čłonami a dirigentom Frankom Čórlichom móžeše Jan Čěpic rjec, zo je spěwny cyłk w minjenym lěće 16 wustupow měł. Z toho su dwanaće Božich mšow wobrubili, při čimž tworjachu primicne kemše měšnika Floriana Mróza w juniju wusahowacy wjeršk. Připóznaće žnějachu tež w Chrósćicach, spěwajo tam sobu Pasion, a w awgusće wuhotowachu z chórom Meja lětni koncert. Čěpic młodostnych namołwi, so chórej přizamknyć, a poda wuhlad na klětu.
Wjelelětnym čłonam gratulowali
Budyska župa je wčera Moniku Justec, Ernu Wincarjowu, Rejzu Hazynu, Klawsa Pětrenca, Měrćina Krawca, Měrćina Wornarja a Hinca Cušku počesćiła. Wšitcy sedmjo su dlěje hač sydom lětdźesatkow z čłonom Domowiny.
Budyšin (LTh/SN). Wjednistwo Budyskeje župy „Jan Arnošt Smoler“ je na wčerawšej adwentničce na žurli Budyskeho Serbskeho domu, kotraž bě zdobom hłowna zhromadźizna, swojim čłonam za aktiwne skutkowanje w běhu lěta dźakowało a zdobom wšěm składnosć dało, mjez sobu serbować a sej nazhonjenja kaž tež mysle wuměnjeć.
Po witanju županki Jany Pětroweje rozprawješe regionalna rěčnica Sonja Hrjehorjowa z mnohimi fotami wo lětušich aktiwitach župy, kaž na přikład wo župnym wulěće do Žitawy a do čěskeho Hrádeka nad Nisou a wo swójbnym swjedźenju w Hodźiju. Při skibce wosuška a słódnych poprjančkach słuchachu přitomni wčerana čitanje basnicy Dorotheje Šołćineje a na słuchohru klankodźiwadźelnika Měrćina Krawca.
Witaja wobzamknjenje rady
Wojerecy (SN/JaW). Předsydstwo Wojerowskeje župy „Handrij Zejler“ wita wobzamknjenje rady Załožby za serbski lud, přistajić projektoweho managera, kiž ma župy a towarstwa podpěrać. Tak rozmyslowachu na swojim wčerawšim wuradźowanju tež hnydom wo tym, kak móhli managera za swoje předewzaća zapřahnyć, zdźěli rěčnica župy Christina Šołćina.
Rozjimali su wčera we Wojerowskim Domowinskim domje tež plan klětušich projektow. Mjez druhim planunja za 14. junij dźeń wotewrjenych duri na tamnišej ležownosći Domowiny, zo bychu dwurěčnym šulam, pěstowarnjam a towarstwam župy składnosć skićili so předstajić. „Dale budźemy podpěrać wuhotowanje serbskeho domizniskeho dnja, kotryž wotměje so 17. junija w Blunju. A za kónc awgusta planujemy swójbne popołdnjo pola nas w Domowinskim domje“, zjima Christina Šołćina najwažniše projekty lěta 2018.
