Berlin (dpa/SN). Na centralnym zarjadowanju w Berlinje wopominachu dźensa wopory němskeho dźělenja. Składnostnje 54. róčnicy twara Berlinskeje murje jako symbol dźělenja je Berlinski knježacy měšćanosta Michael Müller (SPD) při něhdyšej muri na Bernauskej dróze wěnc połožił. Do toho wotmě so pobožnosć w kapałce wujednanja. Tež zastupjerjo zwjazkoweho knježerstwa ­so na wopominanju wobdźělichu.

13. awgusta 1961 bě wjednistwo strony SED pod nawodom Waltera Ulbrichta z twarom murje započało. Něhdźe 155 kilometrow dołha dźěleše wona 28 lět zapadny a wuchodny dźěl Berlina. Hakle podawki 9. nowembra 1989 postarachu so wo to, zo bu murja powalena a so lěto po tym cyle zhubi.