Wubědźowanje młodych awtorow wuspěšnje zakónčene
Budyšin (SN/MiR). 33 awtorow je so na lětušim 40. literarnym wubědźowanju Ludoweho nakładnistwa Domowina a Załožby za serbski lud z 45 přinoškami wobdźěliło. Jedyn tekst bu w delnjoserbšćinje zapodaty, dalše 44 w hornjoserbšćinje. „Tute wurisanje na polu serbskeje rěče a literatury mamy hižo wot 1970tych lět“, rozłoži sobudźěłaćer załožby John Petrik. Lětuši wobdźělnicy běchu w starobje 15 do 33 lět. Wjetšina z nich bě zańdźeny pjatk wječor do Budyskeho hosćenca „Wjelbik“ na wozjewjenje najlěpšich a na přepodaće mytow přišło. Hakle tón wječor zhonichu, koho měješe jury za wuznamjenjenja hódnych.