Słuša Zły Komorow do serbskeho sydlenskeho ruma? Wo tymle prašenju rozmysluja tam hižo wjacore lěta. Na jed­nym boku so někotři měšćenjo na swoje serbske korjenje dopominaja, druzy maja to za zwažliwe. W měsće dźěła tež Domowinska skupina.

Zły Komorow (SN/at). „Posedźenje zhromadźizny měšćanskich zapósłancow w měrcu 2016 je poslednja móžnosć, zapodać próstwu wo přiwzaće města do zdźědźeneho serbskeho sydlenskeho ruma.“ Tole rjekny Eckhart Stein, zastupjer Lěwicy w Zwjazkarstwje za wotewrjeny Zły Komorow, wčera wječor na zarjadowanju załožby Rosy Luxemburg w Złokomorowskej Tenglerec kniharni. „Serbja – prawo hinaši być“ bě hesło wječorka, na kotryž běštaj bywši zapósłanc Krajneho sejma Braniborskeje dr. Gerd-Rüdiger Hoffmann a pěsnjer Bernd Pittkunings přeprosyłoj.