Premjera lětušeho ptačeho kwasa SLA w Choćebuzu poradźena

Choćebuz (HA/SN). Serbski ludowy ansambl je sej za lětuši wječorny program k ptačemu kwasej a zapustej zaso aktualnu tematiku wupytał. Kruch „Kak dźiwnje swět so wobroća“, kotryž so delnjoserbsce „Žony maja přeco prawje?!“ mjenuje, je jara pisany. Na tymle předsta­je­nju so wšitko hinak wjerći hač w nor­- malnym žiwjenju w Serbach.

Awtorka Jěwa-Marja Čornakec je namakała staru tradiciju, kajkaž bě w delnjołužiskich Popojcach a w hornjołužiskich Sulšecach z wašnjom – přazny kwas. Tajki běchu před něhdźe 50 lětami po pjerjodrěću wotměli. Žony a holcy chcedźa tónle nałožk zaso wožiwić. Mužojo a hólcy su přeprošeni, ale tak prawje so jim to njespodoba, čuja so jako šefojo wustorčeni, a wosebje tohodla, zo njebudźe tam braška, ale braškowka. Zwada je tuž – za hraće jara wuběrnje – programěrowana. Wubědźowanje ze spěwami, rejemi, powědanjom žortow a žiwjenskich wěrnosćow ma pokazać, štó je lěpši – žony abo mužojo. Wšitko pak so zbožownje kónči a kwasny porik so namaka.