Zarjadowanja Smolerjoweho lěta předstajili

Budyšin (SN/CoR). „Wšojedne, na kotru dźensnišu serbsku instituciju hladaš abo z kotrymi wudobyćemi serbskeho duchowneho žiwjenja so zaběraš, wšudźe storčiš na Jana Arnošta Smolerja.“ Takle wopisa předsyda Maćicy Serbskeje Jan Malink wuznam jednoho z najmarkantnišich wosobinow serbskich stawiznow na zhromadnej nowinarskej konferency z jednaćelku LND Marku Maćijowej a předsydu Domowiny Dawidom Statnikom dźens rano w Budyskej Smolerjec kniharni. Składnostnje 200. narodnin Jana Arnošta Smolerja (1816–1884) informowachu woni wo zarjadowanjach Smolerjoweho lěta a předstajichu w LND wušły dwurěčny lětak, dawacy nimo přehlada terminow tež dohlad do skutkowanja „wosobiny z wusahowacym wuznamom za Serbow“ (Marka Maćijowa), kotraž je přiwšěm „njeznata“ (Jan Malink). Jako prěni scyła bě so Smoler powołansce serbstwu wěnował.