Mnichow (dpa/K/SN). Njedźiwajcy wšeho wotradźowanja a samo hroženja poda so bayerski ministerski prezident a předsyda zwjazkoweje CSU Horst Seehofer dźensa do Moskwy, zo by so z ruskim prezidentom Wladimirom Putinom zetkał. Přewodźany je wot swojeho předchadnika Edmunda Stoibera, kiž ma k Putinej pječa dobre zwiski a je za Seehofera zetkanje z nim napletł.

Bayerske hospodarstwo wuprawu premiera do ruskeje stolicy wuraznje wita. „Dialog njesmě so přetorhnyć. Ruska je za nas jara wažny hospodarski partner“, rjekny hłowny jednaćel Zjednoćenstwa bayerskeho hospodarstwa Bertram Brossardt. „Rusku trjebamy politisce, Rusku trjebamy hospodarsce. Dołheho časa wotcuzbnjenja njesmě być“, wón doda. Brossardt ani hospodarske sankcije přećiwo Ruskej njeschwala. Tež w Bayerskej su mnohe branše a předewzaća wot nich potrjechene. „Politisce njejsu wone ničo změnili, hospodarsce pak jara škodźeli“, wón přispomni. Tež hłowny jednaćel zwjazka bayerskeje Industrijneje a wikowanskeje komory Peter Driessen wita, zo Seehofer ruskeho prezidenta wopyta.