Z dźensnišeho posedźenja Sakskeho krajneho sejma

Drježdźany (SN/MkWj). Dosć turbulentnu debatu wo nutřkownej wěstoće w Swobodnym staće Sakskej a wo přiběracej namocy přećiwo ćěkancam a pomocnikam móžachu zapósłancy a hosćo krajneho sejma dźensa w Drježdźanach dožiwić. Frakcija Lěwicy bě wo to prosyła, na dźensnišim posedźenju sejma wo wšudźe nastawacych tak mjenowanych wobydlerskich woborach debatować.

Rěčnica Lěwicy Kerstin Köditz kritizowaše, zo we wobydlerskich woborach neonacisća runje tak sobu skutkuja kaž hooliganojo a rockerojo. Tele skupiny stajnje zaso z namócnosćemi tež přećiwo wukrajnikam napadnu. „Wone njejsu pomoc, ale wulke wohroženje“, Köditz rjekny. Stat měł swojej zamołwitosći wotpowědować a skupiny zakazać.