Martin Gorholt wita wuznaće k serbskosći

Podstupim (SN/JaW). Měšćanostaj delnjołužiskeju městow Kalawy a Lubina staj zhromadnje z Radu za serbske naležnosće Braniborskeje na wčerawšim wuradźowanju gremija w Podstupimskim krajnym sejmje próstwu podpisałoj, namrětemu serbskemu sy­dlenskemu rumej přisłušeć směć. To zdźěli předsyda braniborskeje serbskeje rady Torsten Mak na naprašowanje SN. „Smy próstwje nawodźe referata w ministerstwje za wědomosć, slědźenje a kulturu Clemensej Neumannej, kiž zastupowaše kulturneho sekretara Martina Gorholta, přepodali, zo by ju pruwował“, rjekny Mak.

„Witam wuznaće Lubinjanow a Kalawčanow k serbskosći. A wjeselu so, zo so tež w dalšich komunach z mysličku rozestajeja, stajić wotpowědnu próstwu wo pruwowanje přisłušnosće. Serbska kul­tura a dwurěčnosć stej wosebitosć na juhu Braniborskeje a přinošujetej sylnje k atraktiwnosći regiona“, piše społnomócnjeny braniborskeho knježerstwa za serbske naležnosće Martin Gorholt (SPD) dźensa w nowinskej zdźělence.