Dobyćerjo wubědźowanja „Młodźina hudźi“ koncertowali

Wuznamjenjeni lětušeho regionalneho wubědźowanja „Młodźina hudźi“ su předposledni dźeń januara w awli Wojerowskeho Lessingoweho gymnazija koncertowali. 17 dźěći a młodostnych w starobje dźewjeć do 16 lět z hudźbnych šulow Budyšin, Třikrajowy róžk, Zhorjelc a Wojerecy předstaji so jako solist, w duwje abo w ansamblu.

Wulka pilnosć, wobstajnosć a hłuboki nutřkowny poćah k hudźbje k tomu wjedu, zo hižo najmłódši w starobje dźewjeć a dźesać lět wuměłske wukony prezentuja, zo so jenož dźiwaš. A njeje to jeničce hrajerska wušiknosć, kotraž wulki zaćišć zawostaja. Tež předstajenske kmanosće w přednoškach emocionalnje a čile skutkuja. Tak Maria a jeje bratr Daniel Pfister na klawěrje a klarineće wulkotnje hromadźe hudźitej. W kruchu „Andante“ Ludwiga Spohra je dynamiske zwukowanje klarinety na koncerće wosebje napadnyło.