Zwjazkowy prezident Joachim Gauck město Budyšin wopytał
Budyšin (SN/BŠe/MkWj). Nimale tři tydźenje po wohenju w planowanym domje ćěkancow w bywšim hotelu „Husarenhof“ je zwjazkowy prezident Joachim Gauck dźensa Budyšin wopytał. W radnicy witaštaj jeho dopołdnja rejwarjej Serbskeho ludoweho ansambla Phillipp Förster a Katarina Hermannowa, woblečenaj drastu Budyskich ewangelskich Serbow, z chlěbom a selu. Joachim Gauck a sakski ministerski prezident Stanisław Tilich (CDU) zapisaštaj so w přitomnosći Budyskeho měšćanosty Alexandera Ahrensa (njestronjan) do złoteje knihi sprjewineho města. Na to zetka so zwjazkowy prezident z komunalnymi politikarjemi regiona. Mjez druhim běchu Kamjenskeho měšćanostu Rolanda Dantza (njestronjan), Wojerowskeho měšćanostu Stefana Skoru (CDU), wjesnjanostow Šěrachowa Svena Gabriela (FDP) a Kumwałda Thomasa Martolocka (CDU) na rozmołwu přeprosyli. Kaž rěčnik Budyskeho měšćanskeho zarjadnistwa André Wucht zdźěli, njebě žadyn serbski komunalny politikar přitomny.
