Nastawk w kónctydźenskej přiłoze Serbskich Nowin wo hońtwjerjach je bywšeho wučerja Pawoła Rotu pohnuł wo serbskich zapřijećach kołowokoło hońtwjerjenja rozmyslować. Zhromadnje z Ralbičanom wěnujemy so w tymle a w přichodnych Předźenakach tejle zajimawej naležnosći, zo bychmy čitarjam a dalšim zajimcam serbske wobroty zbližili. Dźensa wobjednawamy słowničk zwěrinstwa a wliw ratarskeho hospodarstwa na zwěrinu a hońtwjerjenje.
Někotre słowa k Róžeńčanskim hońtwjerjam
Něhdźe na proze lěta 2015/2016 čitach w Předźenaku zajimawe powěsće wo hońtwjerjach wokoło Róžanta. Wědomi Serbja chcedźa woni w swojej poswjatokowej zaběrje nimo wobchadneje rady tež wonu móhłrjec „hońtwjersku powołansku“ rěč w maćeršćinje nałožować. Ale njeznaja wotpowědny serbski słowoskład. Wšako stej hońtwjerstwo a jeho fachowa rěč wupłód němskeho zemjanstwa, započaceho so před něhdźe tysac lětami.