Prapremjera 5. sinfonije „Stalingrad“ Hinca Roja w Berlinje

Berlin (bn/SN). Něhdźe 400 wopytowarjow, mjez nimi zapósłancaj zwjazkoweho sejma Thomas Jurk (SPD) a Caren Ley (Lěwica), zapósłanc krajneho sakskeho sejma Hajko Kozel (Lěwica) a Budyski wyši měšćanosta Alexander Ahrens (njestronjan), dožiwi minjeny pjatk we wobłuku swjatočneho koncerta prapremjeru 5. sinfonije Hinca Roja „Stalingrad“ w Berlinskim wulkopósłanstwje Ruskeje federacije. Zhromadny projekt Zwjazka serbskich wuměłcow a Serbskeho ludoweho ansambla, kotryž bě załožba za serbski lud spěchowała, běštej městopředsyda ZSW Alfons Wićaz a nawoda wuměłskeho zawodneho běrowa SLA Tobias Rucha prěnjorjadnje organizowałoj.