Njebjelčanske wuměłstwowe towarstwo Kamjenjak z.t. zhladuje na swoje dotal najwuspěšniše lěto. Mjez druhim maja jeho čłonojo zetkanje rjemjeslnikow za wosebity wjeršk rozžohnowaceho so lěta 2016.

Njebjelčicy (SN/MiR). Hižo w zažnym nalěću zetkachu so zajimcy k prěnjej bursy starych družin symjenja w Njebjelčanskim gmejnskim centrumje. To bě čłonam towarstwa Kamjenjak nastork, wustawki změnić. Nětko maja w nich nimo wuměłskeho skutkowanja tež angažement za přirodu zakótwjeny.

„Za wosebite mam lětsa tydźenje, hdyž su rjemjeslnicy z cyłeje Němskeje w Miłočanskej skale Při Krabatowym kamjenju dźěłali. To je wulku syłu ludźi přiwabiło“, powěda čłon předsydstwa Lukaš Deleńk. „Zajimcy mějachu spočatk junija we wobłuku projekta Wuměłstwowy bus składnosć, rjemjeslnikow při dźěle w skale dožiwić a sej zdobom zbližić refugij, kotryž zjednoća wuměłstwo a přirodu“, rozłožuje městoprědsyda Kamjenjaka Thomas Noack, „jónkrótna to wěc.“ Mjez hosćimi běchu sakska statna ministerka za wědomosć a wuměłstwo dr. Eva-Maria Stange (SPD) kaž tež prominentni z hospodarstwa a politiki.