Do noweho lěta wita kulturny časopis Rozhlad čitarjow z čerstwym wobličom. Wuhotowarka Aileen Burkhardt je sej dotalny layout z wótrym wóčkom wobhladała a dźěłajo z pismom, rozrjadowanjom přinoškow a wobrazami spodobny a přewidny nowy naćisk stworiła. Nastawki maja tuž hódne a skutkowne městno. Format wostanje po zwučenym wašnju tajki, zo hodźi so časopis do kóždeje kapsy – jako idealny přewodnik za jězby, pućowanja abo wšědne přestawki.

Kaž na wopyće pola Berlinskich Serbow pohladamy tež w lěće 2017 za mjezy Łužicy. Tónraz wozmje nas Benjamin Nawka sobu do Šwabskeje, hdźež móžemy za serbskimi blidami a w šwabskich lokalach do atmosfery swětoweho serbstwa počuchać. Prěnja stacija je Tübingen.

Dalši króć pohladamy do Kanady, hdźež dźěłaja wšelake institucije na iniciatiwu stata po principje „active offer“. Poskićeja posłužby tež tam aktiwnje w francošćinje a jendźelšćinje, hdźež njejstej wonej hamtskej, ale mjeńšinowej rěči. Martin Normand koncept w rozmołwje z Rozhladom bliže wopisuje.