Awtorojo „pjeć lětstotkow“ na dypk přinjesli

srjeda, 29. měrca 2017
artikl hódnoćić
(0 )
Někotři awtorojo knihi „Pjeć lětstotkow – Serbja a reformacija“ su wčera swój eksemplar wosobinsce přepodaty dóstali.  Foto: SN/Maćij Bulank Někotři awtorojo knihi „Pjeć lětstotkow – Serbja a reformacija“ su wčera swój eksemplar wosobinsce přepodaty dóstali. Foto: SN/Maćij Bulank

Budyšin (SN/CoR). Štóž je so wčera na premjerje knihi „Pjeć lětstotkow – Serbja a reformacija“ w farskim domje wosady swjateho Michała Budyšin wobdźělił, měješe zbožo. 500 lět ewangelskeho serbskeho žiwjenja w běhu połdra hodźiny na tajke přijomne a wotměnjawe wašnje rozkładowane dóstać, to bě dožiwjenje. Wužadanje za wudawaćela, serbskeho superintendenta Jana Malinka, a za přitomnych awtorow Trudlu a dr. Lubinu Malinkowu, dr. Jensa Buliša, dr. Edmunda Pjecha a Měrćina Wirtha njebě cyle jednore. Wšako mějachu dohromady 19, na wšelakore aspekty wusměrjacych so wědomostnych přinoškow na dypk přinjesć. A to so jim z podpěru zajimawych ilustracijow, fotow a wobrazow, jara derje zešlachći. Zo je sej wčera po předstajenju nowostki kóždy pjaty z dohromady 50 hosći knihu kupił, měješe skerje mało ze žortnej namołwu Malinka činić, zo „wobdźělenje njewuwjazuje z čitanja“, ale z přeswědčiwej kwalitu publikacije.

Před štyrjomi lětami započa Ludowe nakładnistwo Domowina zhromadnje z Budyskim Serbskim muzejom wo projekće rozmyslować. Jednaćelka LND Marka Maćijowa dźakowaše so wčera wšitkim sobuskutkowacym a podpěraćelam, wosebje tež kulturnemu rumej Hornja Łužica-Delnja Šleska za přiwzaće do zwjazkoweho spěchowanskeho programa. Jan Malink wupraji lektorce Katrin Čornakec dźak za „harmoniske zhromadne dźěło“. Po jeje słowach žadaše sej předewšěm redakcija wobrazow, wo čož bě so zhromadnje z wuhotowarku Isu Bryccynej starała, wjele prócy. Kniha ma hač do kónca meje potuńšenu płaćiznu.

wozjewjene w: Kultura
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND