Paralelnje z němskimi mišterstwami lochkoatletiki seniorow na 10 000 metrow na Budyskej Młynkec łuce wotmě so mjeztym hižo 26. jara naročny běh na Sokolnik a po nim. Tele napinace wubědźowanje z Wjazońcy hač na 589 metrow wysoki wjeršk hory a zaso wróćo do stadiona, hdźež běše tež start, je po tradiciji triatlonowe towarstwo Sokolnika organizowało. Jednotliwe distancy wurisanjow běchu 1 km, 2,5 km, 5 km a 12 km, na kotrychž je cyłkownje 196 atletow cil docpěło. Tři štwórćiny lubowarjow běhanja startowachu na najdlěšimaj čaromaj. Tele wurisanje běše hižo lětuše šeste za rjadnu lisćinu Wopačanski cup. Aktiwni běchu z cyłeje Hornjeje kaž ze srjedźneje Łužicy, z Drježdźan, Pirny a někotrych dalšich městow Sakskeje. Mjez nimi je horstka serbskich z brawuru wobstała. Na 1 km a 2,5 km wubědźowachu so młódši a starši šulerjo. Wurjadnje wojował je na 1 km šuler Budyskeje Serbskeje zakładneje šule Jarek Schade, kiž bě dobyćer w klasy U10 w 3:55 min. Cyłkownaj dobyćerjej na 5 km (64 w cilu) běštaj Annett Schröder z Běłeje Wody (27:07 min) a Niels Göhler (22:55 min) z Mišna. Tu wobsadźištaj Leo Čórlich z Budyšina 3.