Wojerecy (KD/SN). Dohromady sydom wuměłcow-jednotliwcow, hudźbnych a dźiwadłowych skupin z Němskeje, z europskich krajow, Israela a samo Brazilskeje su minjenu njedźelu mjeztym hižo dźewjaty nadróžny dźiwadłowy swjedźeń Wojerowskeje Kulturneje fabriki wuhotowali. Na torhošću před starej radnicu, na susodnych tak mjenowanych Čornych wikach kaž tež při wobydlerskim centrumje Piwarska hasa 1 wustupichu artisća, skupina bubnarjow a bubnarkow DrumTastic, brazilske dźiwadło na štabrach Skaramouche a israelska wuměłča Jay Toor ze swojim comedy-programom. W nim předstaji wona njewšědny dowolowy dźeń na přibrjohu a zapřija k wjeselu publikuma tohorunja někotrych přihladowarjow. Tež serbscy zajimcy z Kulowa, Njeswačidła, Pančic-Kukowa a wot druhdźe běchu sej do Wojerec dojěli. Dožiwichu tam přijomnu atmosferu, kotraž měješe něšto dowoloweho na sebi.