Projekt „KuBiMoBil“ ma šulam kubłanski poskitk wolóžić

Budyšin (SN/CoR). Zo bychu šule regiona přichodnje bjez wulkeho napinanja abo financnych problemow z dźěćimi a młodostnymi do dźiwadła jěć móhli, wo to stara so wot 3. julija pedagoga Němsko-Serbskeho ludoweho dźiwadła Patrick Niegsch. Wón koordinuje projekt „KuBiMoBil“ – kulturne kubłanje jako mobilny kubłanski poskitk we wjesnej kónčinje. Je to je jedyn z wjacorych mobilnych kulturnych projektow, kotrež sakske ministerstwo za wědomosć a wuměłstwo spěchuje. Nošer „KuBiMoBila“ je NSLDź.

„Transport je husto dróši hač zastup do kulturneho zarjadnišća samoho – tak płaći busowa jězba do dźiwadła na přikład pjeć eurow na dźěćo, zastupny lisćik pak jeno tři. Wjesne šule tuž z prawom praja, zo njemóža sej dźiwadłowe předstajenje za šulerjow dowolić. Z toho zrodźi so myslička, sej busowe jězby spěchować dać“, Patrick Niegsch rozłožuje.