Loni běchu Worklečanscy koparscy přećeljo prěni raz turněr za wólnočasne a hobbyjowe mustwa zarjadowali. Po pozitiwnym wothłosu přewjedźechu tajki lětsa znowa w Jaseńcy. Sydom teamow wojowaše wo dobyćerski pokal w modusu kóždy přećiwo kóždemu w hrajnym času dwójce sydom mjeńšin. Trawnik na sportnišću w Jaseńcy běše po sylnym dešću chětro rozmokany. Tuž žana wulce wobhladanjahódna kopańca njenasta. Nimo mustwa wuhotowarja, kotrež bě zakitowar pokala, wobdźělichu so cyłki No Name, Lacio Chrósćicy, Ći swěrni, Tobi a přećeljo kaž tež Serbske micki. Po 21 partijach a fulminantnych 148 wrotach stejachu koparjo mustwa No Name na dobyćerskim podesće. Su wšitke móžne dypki zapakowali, tež wrotowy staw 42:8 bě chětro jasny. Gabriel Zahrodnik (Lacio Chrósćicy) bě z 22 wrotami najlěpši třělc, Dietmar Michael (Tobi a přećeljo) najlěpši wrotar.
Worklečanscy koparscy přećeljo so sponsoram – wosebje Hendrikej Schikorje –, wšěm hrajerkam a hrajerjam a wězo tež wšitkim tym dźakuja, kotřiž mějachu podźěl na wuspěšnym přewjedźenju sportoweho zarjadowanja.
kónčna tabulka: