Nowe lěhwo za migrantow dotwarjene

wutora, 15. septembera 2020
artikl hódnoćić
(0 )

Athen (dpa/SN). Grjekski minister za migraciju Notis Mitarakis wšitkich bjezdomnych migrantow na kupje Lesbos namołwja ručež móžno do noweho, prowizoriskeho stanoweho lěhwa zaćahnyć. To je po słowach Mitarakisa jich winowatosć. „Wot přichodneje póndźele wobdźěłaja sobudźěłaćerjo jenož hišće azylowe próstwy za tych, kotřiž su w lěhwje“, ­rjekny minister wčera rozhłosowemu sćelakej Parapolitika.

Wospjet warnowaše Mitarakis migrantow, wotdźeržowacych druhich wot toho, do noweho prowizoriskeho lěhwa hić, kotrež běchu zamołwići zhromadnje z pomocnymi organizacijemi natwarili. „Wěmy dokładnje, wo koho so jedna“, rjekny wón hladajo na mału skupinu migrantow, kotrychž jako škarakow znaja. Tući běchu minjeny tydźeń woheń zamiškrili, kotryž je lěhwo zničił. Grjekska njeda so wudrěwać, wón doda.

Minjene dny natwarjene lěhwo ma městno za wjace hač 5 000 ćěkancow. Přichodne dny chcedźa je dale wutwarjeć, zo móhli tam wšitkich 12 000 ćěkancow zaměstnić. Wčera běchu sej někotři na dróhach kupy Lesbos žadali, zo jich do zapadneje Europy dowjezu. Zwjetša z Afghanistana pochadźacy migranća wołachu „swobodu, swobodu“.

Lěhwo Moria na kupje Lesbos bě so minjeny tydźeń dospołnje wotpaliło. Bjezposrědnje na to bě tež w Němskej diskusija nastała, hač njeměli dźěl nětko bjezdomnych migrantow do Němskeje přiwjezć. Porno tomu bě grjekske knježerstwo po wohenju potwjerdźiło, zo nima wotpohlad ćěkancow z kupy wzać, dokelž móhli potom tež w druhich lěhwach „samsnu taktiku“ nałožować.

wozjewjene w: Politika
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND