Hač do lěća 2027 ma nowy „Serbski forum wědy při Lawskich hrjebjach“ w Budyšinje hotowy być. Zaćahnyć matej do njeho Serbski institut a Serbski muzej.

Budyšin (SN/JaW). Wo aktualnym stawje „Serbskeho foruma wědy při Lawskich hrjebjach“ zhonichu čłonojo Zwjazkoweho předsydstwa Domowiny na minjenym wuradźowanju wot direktora Załožby za serbski lud Jana Budarja.

Poslednje detaile próstwy wo spěchowanske srědki z hornca strukturneje změny běchu minjene dny w załožbowym zarjedźe zdźěłali. „Mjeztym smy próstwu Sakskemu ministerstwu za kulturu a turizm přepodali. Wšako ma ju Sakska hač do lětušeho junija Zwjazkej zapodać“, wobkrući załožbowy direktor. Tež projektowa koncepcija steji a wuhlady na při­zwolenje su dobre. Kaž Budar w swojej online-prezentaciji zwurazni, liča­ tuchwilu z twarskimi kóštami cyłkownje 30 milionow eurow. Kóšty dźělitej sej Zwjazk, kotryž přewozmje 90 procentow, a swobodny stat po dźesać procen­tach. Tak njetrjeba załožba žane swójske pjenjezy zasadźić.