Berlin (SN/JaW). Posrědkować wědu wo narodnych mjeńšinach na šulach po cyłej zwjazkowej republice bě jedna z ćežišćowych temow wčerawšeho internetneho wuradźowanja Mjeńšinoweje rady Němskeje. Wo tym informuje dźensa Berlinski mjeńšinowy sekretariat w nowinskej zdźělence.
Rada štyrjoch narodnych mjeńšin Němskeje „postup diskusije nastupajo rozmołwu a rozmyslowanje wo tym, wědu wo awtochtonych narodnych mjeńšinach na němskich powšitkownych šulach sylnišo šěrić, jasnje wita“, rěka w zdźělence. To bě sej třěšny zwjazk serbskich towarstwow Domowina na internetnej „implementěrowanskej konferency“ zwjazkoweho ministerstwa za nutřkowne naležnosće (BMI) spočatk tydźenja w mjenje Serbow žadał.