Policija hotuje so na cyły rjad dalšich akcijow w zwjazkowej stolicy
Berlin (dpa/SN). Lětuša meja wostanje dale sezona demonstracijow w Berlinje. Smjertnje znjezboženi w nadróžnym wobchadźe, konflikt na Bliskim wuchodźe, koronapandemija a tema podruže ćahnu ludźi w syłach na dróhi. Wosebje swjatkowny kónc tydźenja budźe w stolicy chětro połne. Policija hotuje so na wulke wužadanja, předewšěm hišće trajaceje koronapandemije dla.
Hižo wčera wječor wotmě so prěnja demonstracija na Alexanderowym naměsće pod hesłom „Přećiwo israelskej agresiji w Palestinje“. Tohorunja wčera dopominaše kolesowy korso při kóždolětnym swět wopřijacym „Ride of Silence“ na smjertnje znjezboženych kolesowarjow. Wobdźělnicy jědźechu mjelčo a zdźěla w běłej drasće po wjacorych měšćanskich dźělach hač k Čerwjenej radnicy.