Załožba za serbski lud medijowe zarjadnišćo přechodnje přewozmje

Budyšin (SN/JaW). Załožba za serbski lud přewozmje pod dotalnym mjenom Sakski wukubłanski a wupruwowanski kanal (SAEK) znate medijowe kubłanske zarjadnišćo do projektoweho nošerstwa. To je rada Załožby za serbski lud na swojim wčerawšim wuradźowanju, kotrež su mjeztym třeći króć online přewjedli, wobzamknyła. Dobru powěsć, zo zaćehnje zarjadnišćo pod nawodom Michała Cyža na 4. poschodźe Budyskeho Serbskeho domu, stołmači žurnalistam na onlinowej nowinarskej konferency po posedźenju rady załožby jeje direktor Jan Budar.