Budyske klankodźiwadło zhladuje na 60 lět wobstaća
Budyšin (SN/CoR). „Lubuju naše klankodźiwadło. Dyrbiš je druhdy jako mjenjehódnu wobhladowanu spartu hajić. Wšako tu najwjace našich přihladowarjow w młodych lětach prěni raz dźiwadłowe předstajenje dožiwja“, rozłoži intendant Němsko-Serbskeho ludoweho dźiwadła Lutz Hillmann minjeny pjatk na jubilejnym zarjadowanju składnostnje 60. róčnicy wobstaća Budyskeho klankodźiwadła. Wone bu 1961 w Serbskim ludowym dźiwadle załožene a bu z wutworjenjom NSLDź 1963 přewzate. Njewěsteho wjedra dla wotmě so pjatkowna wosebita premjera na hłownym jewišću NSLDź. Na poprawom za to předwidźanym městnje na dźiwadłowej zahrodźe wotmě so po tym narodninski swjedźeń. Mjez wopytowarjemi móžeše Hillmann nimo přirjadnicy Budyskeho krajneho rady Birgit Weber a klankodźiwadźelnikow Lipšćanskeho Dźiwadła młodeho swěta, kotřiž su sobotu składnostnje jubileja hóstne předstajenje měli, tež mnohich bywšich kolegow-klankarjow witać.