Modla so kadiš
Budyšin. Lětuša modlitwa kadiš za zamordowanych Budyskeje židowskeje wosady wotměje so njedźelu, 5. septembra, w 17 hodź. na židowskim pohrjebnišću na Mužakowskej dróze. Mužojo njech njezabudu na čapku. Nimo toho poručeja škitny nahubnik wužiwać. Wopominanje woporow holocausta z Budyšina a wokoliny wotměwaja wot 1990 kóžde lěto.
Termin online skazać
Budyšin. Nowy elektroniski system, z kotrymž móžeš sej terminy za přizjewjernju a stawnistwo online dojednać, maja w Budyskim měšćanskim zarjadnistwje. Tale forma online-skazanja je načasna a při wulkim wobjimje naprašowanjow tež trěbna, rěka z měšćanskeho zarjadnistwa. Termin dojednać móža sej zajimcy pod www.bautzen.de.
Kupjel zaso wočinjena
Kamjenc. Po tym zo su minjene dny wjacore kupjele pod hołym njebjom wjedra dla sezonu dočasnje skónčili, móhła Kamjenska halowa kupjel za to alternatiwa być. Kupjel budźe wot 6. septembra po zwučenych časach wočinjena a so na wopytowarjow wjeseli. Sobotu, 25. septembra, pak wostanje zarjadowanja dla cyły dźeń zawrjena.
Kak běchu słužowne žiwe?