Na nazymski koncert

Slepo. Domowinskej župje Delnja Łu­žica a „Jakub Lorenc-Zalěski“ wotmějetej njedźelu, 12. septembra, w 15.30 hodź. nazymski koncert w Serbskim kulturnym centrumje Slepo. Spěwna a hudźbna skupina towarstwa Kólesko předstaji wšelake wobłuki spěwneho herbstwa regiona. Dale rozprawjeja wo mnohostronskim skutkowanju towarstwa, kotrež so wo to prócuje Slepjansku kulturu zachować. Zastup je darmotny, ­proša pak wo dary k zarunanju wudawkow.

Delnjołužiska „nóc muzejow“

Błobošojce. We wobłuku lětušeje nocy muzejow w Delnjej Łužicy wuhotuja jutře, sobotu w Błobošojcach (Bloischdorf) pisany program za cyłu swójbu. Tamniše towarstwo Delnjołužiska serbska muzejowa wjes poskići wodźenja po wusta­jenišću a po wosebitej přehladce Irmgard Kulejoweje „Žiwjenje za wuměłstwo“. Nimo toho čaka „Kwis za małkich a wulkich wotkrywarjow“ na hosći. Program započnje so w 16.30 hodź., zastup płaći za dorosćenych štyri eura resp. euro za dźěći. Podobne zarjadowanja budu samsny dźeń mjez druhim w Hochozy, Gubinje, Drjowku, Zabrodźe a Picnju.

Hein a Dyrlich čitataj