Na wčerawšim triellu tež wo digitalizaciji rěčeli

Berlin (dpa/SN). Po druhej telewizijnej debaće třoch kanclerskich kandidatow w sćelakomaj ARD a ZDF knježi w uniji CDU/CSU dobra nalada nastupajo naprašowanja. Tam chcedźa wo kóždy hłós wolerjow wojować. Kandidat Armin Laschet (CDU) je ataku zahajił. Přiwšěm pak z dweju naprašowanjow měnjenskeju institutow krótko po wčerawšim triellu wuchadźa, zo je kandidat SPD Olaf Scholz dobyćer. Tež kandidatka Zelenych Annalena Baerbock je mjez wolerjemi tójšto sympatije žnjała. Kandidat unije Armin Laschet steji hladajo na prašenje, štó je najbóle přeswědčił, jenož na třećim městnje. Kaž institut Infratest-Dimap wozjewi, ma 41 procentow přihladowarjow Olafa Scholza za dobyćerja třiboja. Slědźenska skupina Wahlen podawa porno tomu 31 procentow.