Kandidaća so na forumje k serbskim a mjeńšinowym temam wuprajili

Chrósćicy (SN/JaW). Škit narodnych mjeńšin měła Němska w Zakładnym zakonju zakótwić. Tomu su na wčerawšim wólbnym forumje Domowiny a Serbskich Nowin w Chróšćanskej „Jednoće“ kandidaća za wólby zwjazkoweho sejma we wólbnym wokrjesu Budyšin (WK 156) přihło­so­wali – přitomni běchu Caren Lay (Lě­wi­ca), Sabine Friedel (SPD, wona zastupowaše Ka­thrin Michel), Birgit Elsner (CDU, wona zastupowaše Rolanda Ermera), Lukas Mosler (Zeleni), Matthias Schniebel (FDP) a Karsten Hilse (AfD). „To je krok do praweho směra“, zwurazni Matthias Schniebel. „Čas za to je zrały, a podpěruju to“, zapleće Lukas Mosler wuprajenje moderatora Axela Arlta, naměstnika šef­redaktora SN, do přihłosowanja. Caren Lay potwjerdźi swoje haj ze słowami: „Hdyž je tež AfD za to, potom tomu ničo wjace na puću njesteji.“