Lětsa měsac wjace kultury pod hołym njebjom na zahrodźe SLA

Budyšin (SN/bn). „Kulturna zahroda“ je prowizoriski titul kooperacije Serbskeho ludoweho ansambla a bary Sundowner, w kotrejež wobłuku chcetaj intendant SLA Tomaš Kreibich-Nawka a gastronom Beno Brězan wopytowarjam wot 8. do 24. junija pisane, přewažnje hudźbne programy pod hołym njebjom wobradźić. „Ideju, zhromadne dźěło intensiwować a kulturny poskitk na měšćanskej zahrodźe pod Röhrscheidtowej baštu rozšěrić, hižo cyłu chwilku wotwažujemoj. W minjenych lětach dźě je SLA hižo wjacore přinoški wuměłskeho programa Sundownera sobu wuhotował. Wjace pak dotal móžno njebě, dokelž bě bara w minjenych lětach za čas přistupna, w kotrymž naš zawod njedźěła“, Kreibich­Nawka rozłoži.