Rědka kantata a nowe pišćele

Ochranow. Towarstwo Srjedźoněmska barokna hudźba w Sakskej, Saksko-Anhaltskej a Durinskej zarjaduje swój dwudnjowski koncertowy rjad „Barock.Musik.Fest.“ lětsa w Ochranowje. Jutře, sobotu, zahaja jón z wodźenjemi mjez druhim po tamnišim ludowědnym muzeju a po měsće. W 16 hodź. slědujetej pod hesłom „Concert lecture“ na cyrkwinej žurli Ochranowskeje bratrowskeje wosady zawodny přednošk a prezentacija „Herrnhaagoweje kantaty“ Philippa Heinricha Molthera. Pod nawodom Petera Koppa zahudźi cyłk Vocal Concert Dresden, solistaj budźetaj sopranistka Anne Stadler a bariton ­Clemens Heidrich. W 17.45 hodź. chce kantor Alexander Rönsch na samsnym městnje „mišterski wutwor pišćeletwarca Eule“ z cyle nowymi, ­tak mjenowanymi Tannen­bergowymi registrami předstajić. W 19 hodź. přizamknje so „Spěwny wječor“. Zarjadowanje wuklinči ­zajutřišim, njedźelu, wot 9.30 hodź. z prě­dowanjom, pišćelowej hudźbu a „cyrk­winskim kofejom“. Za wodźenja kazaja sej popłatk 5 eurow, wšitke dalše zarjadowanja su darmo přistupne.

Koncertaj na Hrodźe