W Braniborskej so lěto a wjace za zwyšenje rěčneje kompetency hiba

Podstupim (SN/mb). Serbska rěč měła so do wšědneho dźěła braniborskeho ministerstwa za kubłanje, młodźinu a sport zapřijeć – to je Kathrin Šwjelina, předsydka Rady za serbske naležnosće Braniborskeje, składnostnje njedawneho posedźenja gremija Serbskim Nowinam wobkrućiła. Ministerstwo je sej drje plan dwanaće dypkow za swoju přichodnu dźěławosć napisało, zastupjerjo Serbow pak maja hišće dosć konkretnych wěckow na starosći. Tak chcedźa digitalizaciju tak nałožować, zo móhli šule po cyłym serbskim sydlenskim rumje wuwučowanje serbšćiny poskićeć (SN su rozprawjeli). Najwjetšej zadźěwkaj stej dotal postajenje, zo dyrbja skupinje wuknjacych znajmjeńša pjeć šulerjow přisłušeć, a brach trěbnych wučerjow. Online-skupiny bychu stejnišća kubłanišćow přesahowacu serbsku wučbu zmóžnili.