Čiła diskusija w Slepom wo situaciji Serbow w změnje strukturow Łužicy
Slepo (SN/mb). „Serbska debata“ je zahajena – wčera wječor witaše dr. Roland Löffler, direktor Krajneje centrale za politiske kubłanje Sakskeje (SLpB), štyrceći zajimcow na žurli Serbskeho kulturneho centruma (SKC) w Slepom a dalšich přez livestream na prěnje zarjadowanje rjadu, kotryž SLpB zhromadnje ze Serbskimi Nowinami (SN) a Załožbu za serbski lud wuhotuje. Na jewišću diskutowachu pod moderaciju naměstnika šefredaktora SN Axela Arlta Slepjanska fararka Jadwiga Malinkowa, Manfred Hermaš, něhdyši wjelelětny župan, Jörg Funda, wjesnjanosta Slepoho, a Frank Knobloch jako wjesny předstejićer Delnjeho Wujězda a motiwator za serbšćinu. Tema wječora: Hdźe namakaja Serbja swoje městno w změnje strukturow?